حیدرآباد ۔ یکم نومبر (ایس او نیوز ) بنگلورو کے مشہور عالم دین مولانا محمد مزمل رشادی کی کار کاماریڈی میں سڑک حادثہ کا شکار ہوگئی جس میں وہ زخمی ہو گئے جبکہ مولانا کے ایک ساتھی ذبیح اللہ موقع پر ہی جاں بحق ہو گئے۔
اطلاع کے مطابق مولا نا مزمل رشادی مہاراشٹرا کے پر بھنی میں جلسہ سے خطاب کے بعد تلنگانہ کے دارالحکومت حیدرآباد جارہے تھے کہ کاماریڈی ضلع میں رائل دھابہ کے قریب منگل علی الصباح تقریبا چار بجے ایک ڈی سی ایم وین، ان کی کار کے سامنے آگئی جس کے نتیجہ میں ڈرائیور نے توازن کھو دیا اور ان کی کار سڑک ڈیوائیڈر سے ٹکرا گئی۔ حادثہ میں ایک کی موقع پر ہی موت ہوگئی جبکہ مولانا مزمل سمییت کار پر سوار مزید دو ساتھی زخمی ہوگئے۔
حادثہ کی اطلاع ملتے ہی مقامی نوجوانوں نے جائے وقوع پر پہنچ کر زخمیوں کو اسپتال منتقل کیا۔ حادثے کے فوری بعد حادثے کی تصاویر مع ایک وائس مسیج سوشیل میڈیا پر وائرل ہوگئی جس سے پتہ چلا کہ کار کو بھی شدید نقصان پہنچا ہے۔
پتہ چلا ہے کہ مرحوم ذبیح اللہ کی میت کو پوسٹ مارٹم کیلئے بنگلور روانہ کیا گیا ہے جبکہ کار پر سوار تمام زخمیوں کو کاماریڈی کے امیریا اسپتال میں ابتدائی علاج کے بعد مزید علاج کے لئے حیدر آباد اسپتال شفٹ کیا گیا ہے۔ بتایا گیا ہے کہ مولانا رشادی کے سر اور جسم پر شدید زخم آئے ہیں اور انہیں آئی سی یو میں رکھا گیا ہے
خبر ملتے ہی دیون پلی پولس جائے وقوع پر وہاں پہنچی اور ضابطہ کی کارروائی مکمل کی۔