انکولہ  :18؍ جنوری  (ایس اؤ نیوز )پچھلے 30برسوں سے رکن پارلیمان بنے بیٹھے اننت کمار ہیگڈے ریاستی وزیر اعلیٰ کے خلاف یک لہجہ میں بات کرنا غیر دستوری ہے اور نہ ہی مہذب ہے۔ اس طرح کے غیر ضروری بیانات دینے سے بہتر ہے کہ وہ بطور ایم پی کیاکیا ترقیاتی کام کئے ہیں وہ سب عوام کے سامنے پیش کریں۔ اترکنڑا ضلع کانگریس صدر سائی گاؤنکر نے ان خیالات کا اظہار کیا۔

شہر میں ضلعی کانگریس کی طرف سےمنعقدہ پریس کانفرنس میں انہوں نے کہاکہ بطور ایم پی  اننت کمار ہیگڈے کی کارکردگی صفر ہے۔ ضلع کے کسی بھی ترقیاتی کاموں کی طرف توجہ نہیں دی۔ جس طرح بارش کے موسم کی شروعات میں بجلی، گرج ہوتی ہے ویسے ہی اننت کمارہیگڈے انتخابات سے پہلے گرجدار آواز  میں بات  کرتےہیں اور عوام کے درمیان نفرت پیدا کرنےکی اہم وجہ بنتے ہیں۔ اگر انہیں ٹکٹ دیا بھی جاتاہے تو وہ جیت نہیں پائیں گے کیونکہ بار بار جھوٹ بول کر عوام کو دھوکہ نہیں دیاجاسکتا۔ اب عوام اچھی طرح سمجھ چکے ہیں۔ انہوں نے وزیر اعلیٰ کےخلاف جو بھی بیان بازی کی ہے ضلعی کانگریس اس کی سخت مذمت کرتی ہے۔

بلاک کانگریس صدر پانڈورنگا گوڈا نے بات کرتےہوئے کہاکہ انتخابات کے موقع پر ہی اپنا مفاد حاصل کرنے کےلئے اننت کمارہیگڈے سرگرم ہوجاتےہیں۔ اس سے قبل انہوں نے دستور بدلنے کی بات کہی تھی ، ذات پات اور دھرموں کے درمیان خلیج پیدا کرکے ووٹ حاصل کرنا ہی ان کا مقصد ہوگیا ہے۔اننت کمار عوام کو بتائیں کہ انہوں نے  پچھلے 30برسوں سے ایم پی فنڈ کس کس تعلقہ کے کن منصوبہ جات میں خرچ کیاہے ۔اقلیتی شعبہ کے وجئے پلئے ، پرشوتم نائک نے بھی اپنے خیالات کا اظہار کیا۔ کانگریس لیڈران ونود بھاسگوڈ، کے ایچ گوڈا، اُدئیے نایک، یکناتھ نائک، شانتی اگیر، سدیپ بنٹھ وغیرہ موجود تھے۔