بھٹکل 5/اکتوبر (ایس او نیوز) بھٹکل کے مرکزی تعلیمی ادارے انجمن حامیئ مسلمین کے تحت چلنے والے انجمن کالج فور ویمن کی شاندار کامیابی کا سلسلہ جاری ہے اور اس بار انجمن کی پانچ طالبات نے نمایاں کامیابی درج کرتے ہوئے انجمن کو پانچ رینک دلانے میں کامیاب ہوگئیں ہیں۔
انجمن کالج فور ویمن کی جانب سے جاری کی گئی پریس ریلیز کے مطابق مئی/جون 2019 کے امتحانات میں بی ایس سی کی تین طالبات نے یونیورسٹی رینک حاصل کیا ہے تو بی کام کی دو طالبات نے بھی رینک حاصل کرتے ہوئے انجمن کا نام روشن کرنے میں کامیاب ہوگئیں ہیں۔
کرناٹکا اسٹیٹ اکّا مہادیوی ویمنس یونیورسٹی، وجیا پورا سے ملحق انجمن کالج کی طرف سے بی ایس سی کے فائنل امتحان میں 50اور بی کام کے امتحان میں 80طالبات شریک ہوئی تھیں۔ان میں سے بی ایس سی فیکلٹی میں مریم سمرن بنت سید سلیم پیرزادے نے %90.03 مارکس کے ساتھ پوری کرناٹکا یونیورسٹی میں پہلا رینک حاصل کیا ہے، جبکہ فاطمہ مہرین قاضی بنت مقبول قاضی نے %88.59 مارکس کے ساتھ دوسرا رینک اور خدیجہ ہانیہ کولا بنت محمد ہارون کولانے %86.64 مارکس کے ساتھ چھٹا رینک حاصل کیا ہے۔
اسی طرح بی کام فیکلٹی میں رعیفہ بنت ابو محمد سدّی باپا %89.46مارکس حاصل کرکے یونیورسٹی میں 6th رینک اور عائشہ ضحی بنت باغ محمد ظفر %88.96مارکس کے ساتھ 9thرینک پانے میں کامیاب ہوگئی ہیں۔
واضح رہے کہ کرناٹک کی اس ویمنس یونیورسٹی سے ریاست کے 150کالجوں کو الحاق ہے اور ہر سال امتحانات میں ہزاروں طالبات شریک ہوتی ہیں۔ ایسے میں پچھلے کچھ عرصے سے انجمن کالج بھٹکل کی طالبات ہر سال شاندار مظاہرا کرتے ہوئے یونیورسٹی کے ان امتحانات میں نمایاں مقام پانے میں کامیاب ہورہی ہیں۔یقینا ان طالبات کی شاندار کارکردگی کے پیچھے ان کی اپنی صلاحیتوں کے ساتھ ان کے اساتذہ کی کڑی محنت اور ایک فعال و متحرک منیجمنٹ کا بھی بڑا اہم کردار ہے۔
طالبات کی اس قابل ستائش کامیابی پر اساتذہ اور انتظامیہ کے ذمہ داران نے مبارکباد پیش کرتے ہوئے امیدظاہر کی ہے کہ انجمن کے تمام تعلیمی مراکز کے طلبہ اور اساتذہ اسی طرح بہترین نتائج لانے کا سلسلہ جاری رکھیں گے۔