بھٹکل 7 / جنوری (ایس او نیوز) بھٹکل میں بی جے پی بعض کارکنان نے پریس کانفرنس کا انعقاد کرتے ہوئے اس بات کا مطالبہ کیا ہے کہ آئندہ پارلیمانی انتخاب میں اتر کنڑا سیٹ کے لئے بی جے پی امیدوار کے طورپر سوشیل ورکر اننت مورتی ہیگڈے کو ٹکٹ دیا جائے ۔
پریس کانفرنس میں خطاب کرتے ہوئے ویویک نائک نے موجودہ رکن پارلیمان اننت کمار ہیگڈے پر در پردہ نشانہ سادھتے ہوئے کہا کہ ہم لوگ ضلع میں ہندوتوا کے بینر تلے کام کرتے آئے ہیں ۔ بھٹکل کا نام استعمال کرتے ہوئے اقتدار پر آنے والوں نے آج تک ضلع میں کوئی ترقیاتی کام نہیں کیا ہے، جب انتخاب کا وقت آتا ہے تو ہمارے لیڈر کو اتر کنڑا اور بھٹکل کی یاد آتی ہے ۔ گزشتہ کئی دہائیوں سے انہوں نے ہندوتوا کے نام سے جو سیاسی فائدہ اٹھایا ہے وہ کافی ہے ۔ اب کسی نئے فرد کو موقع دیا جانا چاہئے۔
پریس کانفرنس میں پانڈو نائک، شریدھر نائک وغیرہ بھی موجود تھے ۔