بھٹکل 24/جنوری (ایس او نیوز) مخدوم کالونی  میں گذشتہ پچیس سالوں سے قومی، ملی، تعلیمی، سماجی،  فلاحی اور نوجوانوں کو متحد رکھنے  کے لئے قائم  الہلال اسوسی ایشن  کے لئے  گذشتہ روز عہدیداران کا انتخاب عمل میں آیا جس میں جناب عبدالرحیم  صدر اور جناب روشن کننگوڈا جنرل سکریٹری کے اہم عہدہ پر فائز ہوگئے۔  بدھ کی شب کو منعقدہ انتخابات میں  مولوی فیضان ایس ایم نائب صدر، مولوی سعید جوکاکو نائب سکریٹری، مولوی عمران کنڈلور محاسب اور مولوی شبیر گنگاولی خازن کی حیثیت سے منتخب ہوئے ہیں۔

مخدوم کالونی  پہاڑی کا ایک بڑا حصہ الہلال اسوسی ایشن  کے دائرے میں آتا ہے جہاں چار مساجد ہیں، ساتھ ساتھ  بندر روڈ والا کافی حصہ بھی  الہلال کے حدود میں آتا ہے۔

یاد رہے کہ گذشتہ چار  سالوں سے بھٹکل میں عیدالاضحیٰ کے موقع پر قربانی کے جانوروں کی ہڈیاں،اوجھڑی  اور بےکار گوشت   جمع کرکے ٹھکانے لگانے  کی ذمہ داری قومی سماجی ادارہ مجلس اصلاح و تنظیم نے الہلال اسوسی ایشن کو دی تھی اور اس ادارہ کے نوجوانوں نے عید کی خوشی کے موقع پر بھی اپنا پورا وقت   بہترین خدمات انجام دیتے ہوئے گذارا تھا جس کی ہر طرف سے ستائش کی گئی تھی۔

علاقہ کی فلاح و بہبودی کے ساتھ ساتھ کرکٹ ، کبڈی اور دیگر اسپورٹس مقابلوں میں بھی الہلال ٹیم  حصہ لیتی رہی ہے۔

الہلال کے نئے عہدیداران منتخب ہونے پر شہر کے کئی دیگر اسپورٹس سینٹروں کی جانب سے صدر، سکریٹری ودیگر عہدیداروں کو  مبارکبادیاں  پیش کی گئی ہیں۔