بھٹکل کے اتر کوپّا میں کنویں کے اندر پائی گئی خاتون کی لاش
بھٹکل 10/ اکتوبر (ایس او نیوز) بھٹکل تعلقہ کے اتر کوپّا نامی علاقے میں ایک کنویں کے اندر خاتون کی لاش پائی گئی جس کے بارے میں خاتون کے میکے والوں نے شکوک کا اظہار کرتے ہوئے پولیس کے پاس شکایت درج کروائی ہے ۔
کنویں کے اندر مردہ حالت میں پائی گئی لاش کی شناخت لکشمی وینکٹیش گونڈا (32 سال) کے طور پر کی گئی ہے ۔ بتایا جاتا ہے کہ لکشمی کی شادی ڈیڑھ سال قبل ہی ہوئی تھی اور ابھی وہ لاولد تھی ۔ اس کا شوہر وینکٹیش قلی مزدوری کرتا ہے ۔ شادی کے بعد ابتدائی دنوں سے لکشمی اور اس کی ساس میں ان بن شروع ہوگئی تھی ، جس کے بعد گزشتہ سات آٹھ مہینوں سے میاں بیوی دونوں علاحدہ مکان میں ساتھ رہنے لگے تھے ۔
اتوار کے دن شام میں لکشمی گھر سے لاپتہ ہوگئی پھر اس کی تلاش کرنے والوں کو لاش گھر کے پاس موجود ایک کنویں میں ملی ۔ جس کے بعد پولیس میں شکایت درج کروائی گئی ہے ۔ جس پر کارروائی کرتے ہوئے پولیس نے تحقیقات شروع کی ہے ۔