یوکرین میں کرناٹک کے 91 طلباء پھنسے ہیں:چیف منسٹر بسواراج بومئی
بنگلورو،26؍فروری (ایس او نیوز؍ایجنسی) ریاستی حکومت نے آج کہا کہ یوکرین میں ریاست کے 91 افراد پھنسے ہوئے ہیں اور سبھی وہاں ایم بی بی ایس میں زیرتعلیم ہیں۔ دریں اثناء چیف منسٹر بسواراج بومئی نے جنگ زدہ ملک میں طلبہ کی سلامتی او ران کے انخلاء کے ضمن میں وزیر خارجہ ایس جئے شنکر سے بات چیت کی۔
کرناٹک ریاستی ڈیزاسٹر مینجمنٹ اتھارٹی (کے ایس ڈی ایم اے) کے مطابق آج صبح 6بجے تک اس کے کنٹرول روم کو پھنسے ہوئے افراد سے متعلق موصولہ ضلع واری معلومات کے تحت تمام91 افراد یوکرین میں ایم بی بی ایس کی تعلیم حاصل کررہے ہیں۔چو بیس گھنٹے کارکرد کنٹرول روم پر وصول کردہ یہ تمام معلومات وزارت خارجہ اور کیف میں موجود ہندوستانی سفارت خانہ کو فراہم کردی گئیں تا کہ کرناٹک کے پھنسے ہوئے طلباء کی محفوط واپسی کے لیے ہر ممکن انتظامات کیے جاسکیں۔
مزید برآں یوکرین کے سرحدی ملکوں میں وزارت خارجہ کے عہدیدار‘ متبادل راستوں سے محفوظ انخلاء کیلئے اہم مقامات پر موجود ہیں۔ہم نے ان سے پُرسکون رہنے اور صورت حال کا ہمت سے سامنا کرنے کی درخواست کی او رانہیں ان کے محفوظ انخلاء کے مسئلہ کی جنگی خطوط پر یکسوئی کا تیقن دیا۔
“ جو طلباء وہاں پھنسے ہوئے ہیں، ان میں بنگلورو کے 28، میسور کے 10، بیلاری اور ہاسن کے پانچ پانچ اور دیگر اضلاع کے طلباء شامل ہیں۔ کے ایس ڈی ایم اے نے کہا کہ وزارت خارجہ کی تازہ اطلاعات کے مطابق اس کی ٹیمیں‘ 24/ فروری کو یوکرین کی سرحدوں کیلئے روانہ ہوچکی ہیں اور یوکرین میں ہندوستانی شہریوں کی انخلاء میں مدد کرنے وزارت خارجہ کی ٹیمیں یوکرین کے سرحدی ملکوں ہنگری، پولینڈ، سلوواک جمہوریہ اور رومانیہ کو روانہ کی جارہی ہیں۔