بھٹکل میں منعقدہ دو روزہ ووٹر آئی ڈی کارڈ کا میگا کیمپ کامیابی کے ساتھ اختتام پذیر؛ 483 نئے نام کئے گئے شامل
بھٹکل 7 مارچ (ایس او نیوز) بھٹکل میں نورحلقہ کی جانب سے منعقدہ دو روزہ ووٹر آئی ڈی فری کیمپ میں 483 نئے ناموں کو ووٹر لسٹ میں شامل کیا گیا جبکہ 710 ووٹر آئی ڈی کے ناموں میں کرکشن، اڈرس تبدیلی یا اِ س جیسے دیگر اُمور انجام دئے گئے۔
نورحلقہ کے کنوینر عبدالسمیع صدیق نے بتایا کہ چھ اسپورٹس سینٹروں پر مشتمل نورحلقہ کی طرف سے رکھے گئے کیمپ میں تمام اسپورٹس سینٹرس کے ذمہ داران نے بڑھ چڑھ کر اپنی خدمات پیش کیں اور بھٹکل کے عوام نے بھی اس کیمپ سے بھرپور فائدہ اُٹھایا۔
بھٹکل تحصیلدار نے بھی اس فری کیمپ کے لئے بھرپور تعاون فراہم کیا اور پہلے دن پیر کو دس بلاک لیول آفسرس (بی ایل او) کو اس کیمپ میں ناموں کے اندراج کے لئے روانہ فرمایا، جن کے ساتھ 35 سے زائد فیڈریشن کے والنٹیرس اور انجمن طلبہ نے بھی اپنی خدمات انجام دیں۔
بندرروڈ فورتھ کراس میں واقع الافراح شادی ہال میں منعقدہ کیمپ کے پہلے دن عوام کا اس قدر ہجوم تھا کہ شام کے چھ بجنے تک بھی ناموں کے اندراج کی کاروائی ختم نہیں ہوسکی، جس کو دیکھتے ہوئے ایک روزہ کیمپ کو دو روزہ کیمپ میں تبدیل کراتے ہوئے اگلے دن منگل کو بھی اسے جاری رکھنے کا فیصلہ کیا گیا۔
دوسرے دن بھی تحصیلدار دفتر سے دو بی ایل او سمیت دیگر اہلکار بھی نگرانی کے لئے موجود رہے جبکہ اسپورٹس سینٹرس کے نوجوان اور انجمن کالج کے طلبہ نے ذمہ داری اُٹھائی اور فارم نمبر 6 کے ذریعے ووٹرلسٹ میں نئے ناموں کا اندراج سمیت فارم نمبر 8 کے ذریعے ناموں یا اڈرس وغیرہ میں تبدیلی یا کرکشن جیسے اُمور انجام دئے۔ اس طرح پیر اور منگل دو دن تک بھٹکل سمیت اطراف کے عوام نے اس کیمپ سے بھرپور فائدہ اُٹھایا۔ تحصیلدار دفتر کے ذرائع نے بتایا کہ دودن تک رکھے گئے اس میگا کیمپ میں جملہ 483 نئے نام ووٹرلسٹ میں داخل کرائے گئے ہیں جبکہ فارم نمبر 8 کے ذریعے 710 کرکشن وغیرہ جیسے اُمور ا نجام دئے گئے ہیں۔
بتاتے چلیں کہ کیمپ کے ایک روز قبل یعنی اتوار کو مختلف اسپورٹس سینٹروں کے نوجوانوں اور انجمن طلبہ کو ساحل آن لائن دفتر میں فارم نمبر6 کے ذریعے ناموں کے اندراج اور فارم نمبر 8 کے ذریعے کرکشن وغیرہ کے تعلق سے مکمل معلومات فراہم کی گئی تھی اور اُنہیں ٹریننگ فراہم کی گئی تھی۔
کیمپ میں خدمات فراہم کرنے والوں میں کنوینر عبدالسمیع صدیق سمیت مبشر حُسین ہلارے، فیصل آرمار، اِمشاد مختصر، شمعون حاجی فقیہ، سمیع اللہ اِٹل، ساجد ایس ایم، عبدالباسط گولٹے، فیضان ایس ایم ندوی، روشن کُنن گوڈا، اشرف سعدا وغیرہ پیش پیش رہے، جبکہ کیمپ کو کامیابی کے ساتھ منعقد کرنے میں بھٹکل مسلم یوتھ فیڈریشن اور مجلس اصلاح و تنظیم بھٹکل کی بھی مکمل حمایت حاصل رہی۔ یاد رہے کہ بھٹکل کا نورحلقہ نوراسپورٹس سینٹر، الایمان اسپورٹس سینٹر، سوپر اسٹار اسوسی ایشن، شاہین اسپورٹس سینٹر ، الہلال اسوسی ایشن اور مون اسٹار اسپورٹس سینٹرپرمشتمل ہے۔
کیمپ کے اختتام پر نورحلقہ کے کنوینر جناب عبدالسمیع صدیق نے بتایا کہ ووٹر آئی ڈی کیمپ کے کامیاب انعقاد کے بعد ہم پندرہ دن کا آدھار کارڈ کیمپ منعقد کرنے کا منصوبہ بنارہے ہیں، جس کے لئے بینگلور سے ہمیں سرکاری اہلکاروں کی ایک ٹیم کو بھٹکل لانا ہوگا اور ان کے سفر سمیت رہنے کھانے وغیرہ کا انتظام کرنا ہوگا، بجٹ کے تعلق سے اگر ہمیں عوام کی طرف سے یا کسی ادارہ کی طرف سے تعاون ملتا ہے تو ہم اپنے منصوبے کو رمضان میں ہی منعقد کرسکتے ہیں۔