سون بھدر، 23 /ستمبر (ایس او نیوز): اترپردیش کے سون بھدر ضلع میں منگل کی دیر رات ایک پک اَپ گاڑی سڑک کنارے کھڑے ٹرک سے ٹکرا گئی، جس کے نتیجے میں ڈرائیور سمیت دو نوجوانوں کی موت ہوگئی۔ حادثہ سُکریت کے چہلوا گھاٹی علاقے میں پیش آیا۔

مقامی پولیس کے مطابق پک اَپ میں سوار دونوں افراد بلیا سے سامان پہنچانے کے بعد دُدھی واپس جارہے تھے۔ اسی دوران پک اَپ سڑک کنارے کھڑے ٹرک سے ٹکرا گئی۔ ٹکر اتنی شدید تھی کہ گاڑی بری طرح تباہ ہوگئی اور دونوں افراد موقع پر ہی شدید زخمی ہوگئے۔

متوفین کی شناخت 35 سالہ صدام خان، ساکن کٹولی گاؤں، اور 26 سالہ رویندر کمار عرف سونو کے طور پر ہوئی ہے۔ پولیس دونوں کو مدھوپور کمیونٹی ہیلتھ سینٹر لے گئی، جہاں ڈاکٹروں نے انہیں مردہ قرار دیا۔ پولیس نے لاشوں کو پوسٹ مارٹم کے لیے بھیج کر حادثے کی وجوہات کی تحقیقات شروع کردی ہیں۔