کاروار، 20 جولائی (ایس او نیوز): کرناٹک کے ضلع اُتر کنڑا کے صدر مقام کاروار میں اتوار کی دوپہر پیش آئے ایک دلخراش حادثے میں ایک 55 سالہ خاتون اُس وقت جاں بحق ہوگئیں جب تیز بارش اور آندھی کے دوران ایک قدیم درخت جڑ سمیت اُکھڑ کر اُن کی پارک کی گئی کار پر جاگرا۔ یہ واقعہ ڈپٹی کمشنر کے دفتر کے قریب واقع پِکّلے اسپتال کے سامنے پیش آیا۔
مہلوکہ کی شناخت لکشمی نرائن ممتےکر، ساکن مَلاپور کے طور پر ہوئی ہے۔ اطلاعات کے مطابق وہ اپنی ایک ماہ کی حاملہ بہو کو طبی معائنے کے لیے اسپتال لے کر آئی تھیں۔ جب اُن کا بیٹا اور بہو اسپتال کے اندر چلے گئے، تو لکشمی کار میں بیٹھ کر اُن کے واپس آنے کا انتظار کر رہی تھیں۔
دوپہر تقریباً 1:45 بجے، شدید بارش اور تیز ہواؤں کے دوران اسپتال کے سامنے موجود ایک تقریباً 70 سال پرانا درخت اچانک جڑ سے اُکھڑ کر گاڑی پر آ گرا۔ درخت کا تنا اتنا بھاری تھا کہ کار کی چھت پر گرتے ہی وہ دب گئی، جس کے نتیجے میں لکشمی اندر پھنس کر شدید زخمی ہو گئیں۔ خون زیادہ بہہ جانے کے سبب، اسپتال پہنچانے تک اُن کا انتقال ہو چکا تھا۔
مقامی افراد، فائر بریگیڈ، ایمرجنسی عملہ اور ٹریفک پولیس فوراً موقع پر پہنچے اور امدادی کارروائی شروع کی۔ کرین اور دیگر آلات کی مدد سے درخت کو کاٹ کر ہٹایا گیا اور گاڑی میں پھنسی ہوئی خاتون کو باہر نکالا گیا۔ انہیں فوری طور پر ضلعی سرکاری اسپتال لے جایا گیا، مگر وہ جانبر نہ ہو سکیں۔
چونکہ علاقے میں ہفتہ واری سنتے بازار جاری تھا، اس لیے سڑک پر بھیڑ کافی زیادہ تھی۔ حادثے کے دوران قریب موجود تین مقامی تاجروں کو بھی معمولی چوٹیں آئیں۔
ٹریفک پولیس کی بروقت کارروائی اور فوری کرین کے انتظام کے باعث درخت کو جلدی کاٹ کر ہٹایا جا سکا۔ بھاری درخت کے گرنے سے تقریباً چار سے چھ بجلی کے کھمبے اور ایک ٹرانسفارمر بھی منہدم ہوگئے، جس سے علاقے میں بجلی کی سپلائی متاثر ہوئی ہے۔
کاروار میونسپل حکام نے جائے وقوع سے ملبہ ہٹانے اور صورتحال کو معمول پر لانے کے لیے کارروائی شروع کر دی ہے۔