بھٹکل، 19 اکتوبر (ایس او نیوز): قومی سماجی ادارہ مجلس اصلاح و تنظیم کی جانب سے سیرت مہم کے تحت ہندو مسلم بھائی چارے کو فروغ دینے اور حضور اکرم ﷺ کا پیغامِ انسانیت برادرانِ وطن تک پہنچانے کے مقصد سے منعقدہ اجلاس سے خطاب کرتے ہوئے کنڑا روزنامہ وارتھا بھارتی کے چیف ایڈیٹر عبدالسلام پوتیگے نے کہا کہ باہمی اختلافات اور شبہات کو بالائے طاق رکھتے ہوئے معاشرے کو آلودگی، شراب نوشی اور منشیات کی لعنت سے پاک کرنے اور فرقہ وارانہ ہم آہنگی کو فروغ دینے کے لیے تمام سماجی تنظیموں کو متحد ہوکر کام کرنا چاہیے۔

بھٹکل کے جالی بیچ پر واقع کوکوس ریزورٹ میں ’’ہم آہنگی، مکالمہ اور دوستی‘‘ کے عنوان سے منعقدہ اس اجلاس میں مہمانِ خصوصی کی حیثیت سے خطاب کرتے ہوئے عبدالسلام پوتیگے نے کہا کہ معاشرے میں ایک دوسرے کے قریب رہنے کے باوجود اجنبیوں کی طرح زندگی گزارنے کی صورت حال بدلنی چاہیے۔ اختلافات اور جھگڑوں کی کئی وجوہات ہوسکتی ہیں، لیکن سماجی برائیوں کے خاتمے کے لیے تمام تنظیموں کو متحد ہوکر کوشش کرنی چاہیے۔ انہوں نے کہا کہ شہر کو آلودگی، شراب اور منشیات سے پاک بنانے کی کوششوں میں پیغمبر اسلام حضرت محمد ﷺ کی سیرت اور تعلیمات سے رہنمائی حاصل کی جانی چاہیے۔

اس موقع پر علی میاں اسلامک اکیڈمی کے جنرل سکریٹری مولانا محمد الیاس  جاکٹی ندوی نے کہا کہ پیغمبر اسلام ﷺ نے انسانی وقار، انصاف، مساوات اور حسن اخلاق کو خصوصی اہمیت دی ہے۔ انہوں نے کہا کہ اسلام کا انسانی ہمدردی پر مبنی پیغام یہ ہے کہ کسی شخص کا ایمان اس وقت تک کامل نہیں ہوسکتا جب تک وہ اپنے بھائی کے لیے بھی وہی پسند نہ کرے جو اپنے لیے پسند کرتا ہے۔