نئی دہلی، 10/اکتوبر(ایس او نیوز/ایجنسی)اتوار کی صبح سی بی آئی نے مغربی بنگال کے مقامی اداروں میں بھرتیوں کے سلسلے میں کولکتہ میں 12 مقامات پر چھاپے مارے جن میں ممتا بنرجی حکومت کے وزیر فرہاد حکیم اور ایم ایل اے مدن مترا کی رہائش گاہ بھی شامل ہے۔ جب ترنمول نے چھاپے کو لے کر بی جے پی پر حملہ کیا تو بھگوا پارٹی نے بھی اپنے انداز میں جوابی حملہ کیا۔ ٹی ایم سی کا کہنا ہے کہ یہ راج بھون کے سامنے جاری دھرنے سے توجہ ہٹانے کی کوشش کا حصہ ہے۔ دوسری جانب بی جے پی کا کہنا ہے کہ ممتا بنرجی کی پارٹی کے زیادہ تر لیڈر کرپشن میں ملوث ہیں۔ اگر وہ غلط نہیں ہیں تو پھر رو کیوں رہے ہیں؟

جیسے ہی سی بی آئی کی ٹیم نے چھاپہ مارا، حکیم کے حامی ان کی رہائش گاہ کے باہر جمع ہوگئے۔ دریں اثنا، سی بی آئی کی ایک ٹیم نے بھوانی پور علاقے میں شمالی 24 پرگنہ ضلع کے کمارہاٹی سے سابق وزیر اور ایم ایل اے مترا کی رہائش گاہ پر بھی چھاپہ مارا۔سی بی آئی کے ایک ترجمان نے بتایا کہ میونسپل اداروں میں کی گئی بھرتیوں کی جانچ کے سلسلے میں اتوار کو تقریباً 12 مقامات پر چھاپے مارے گئے جن میں کولکاتہ، کنچرا پارہ، بیرک پور، ہلیشہر، دمدم، شمالی دمدم، کرشنا نگر، ٹکی، کمرہٹی، چیتلا، بھوانی پور شامل ہیں۔

ٹی ایم سی ایم پی سوگتا رائے نے کہا کہ یہ ابھیشیک بنرجی کی قیادت میں راج بھون کے باہر جاری احتجاج سے عوام کی توجہ ہٹانے کی کوشش ہے۔ بی جے پی عوام کا غصہ دیکھ رہی ہے۔ اس لیے وہ لوگوں کی توجہ ہٹانے کے لیے ہر ممکن طریقہ استعمال کر رہے ہیں۔بی جے پی کے جنرل سکریٹری اگنی مترا پال نے ان الزامات کو مسترد کرتے ہوئے کہا کہ اگر ترنمول کے پاس چھپانے کے لیے کچھ نہیں ہے تو وہ ای ڈی اور سی بی آئی سے کیوں ڈرتی ہے۔

انہوں نے کہا کہ پارٹی کے تقریباً ہر لیڈر کو کسی نہ کسی الزام کا سامنا ہے۔حکیم اور مترا دونوں کو سی بی آئی نے 2021 میں ناردا اسٹنگ آپریشن کیس میں گرفتار کیا تھا۔ مترا کو بھی 2014 میں سی بی آئی نے شاردا چٹ فنڈ گھوٹالہ کیس میں گرفتار کیا تھا۔ ایجنسی آر کا الزام ہے کہ 2014 سے 2018 کے درمیان ریاست کے مختلف شہری اداروں نے رقم کے عوض تقریباً 15 سو لوگوں کو غیر قانونی طور پر تعینات کیا تھا۔