منگلورو 4؍اگست (ایس او نیوز) مُولکی پولیس اسٹیشن کے حدود میں گیروکٹّے نامی مقام پر پیش آنے والے ایک دردناک واقعے میں ایک خاتون نے پہلے اپنی پانچ سالہ بیٹی کو کنویں پھینکا اور پھرخود بھی کنویں میں چھلانگ لگاکر خودکشی کرلی ہے۔

پولیس کے مطابق سدھاکر کی بیوی سجاتا (۴۰سال) وہ خاتون ہے جس نے یہ انتہائی اقدام کیا ہے۔ کنویں میں پھینکنے کی وجہ سے ہلاک ہونے والی بچی کا نام کرشیتا (۵سال) بتایا جاتا ہے جو کہ یو کے جی میں زیر تعلیم تھی۔سجاتا کا شوہر بینک میں ملازم ہے ۔

اطلاع کے مطابق شوہراپنے کام پر گیا ہواتھا جس کے دوران یہ واردات پیش آئی۔ پولیس کا یہ بھی کہنا ہے کہ بیٹی کی پیدائش کے بعد سے ہی سجاتا ذہنی تناؤ کا شکار رہنے لگی تھی۔ گھر میں سجاتا اور اس کے شوہر کے علاوہ اس کی تین نندیں بھی ساتھ میں رہتی تھیں جوکہ غیر شادی شدہ تھیں۔سجاتا کے گھر والوں کا کہنا ہے کہ سسرال میں اس کی نندوں کی ہراسانی سے تنگ آکر اس نے اس طرح کا قدم اٹھایا ہے۔

مُولکی پولیس اسٹیشن میں اس تعلق سے کیس درج کرلیاگیا ہے۔