بھٹکل 18/جنوری (ایس او نیوز)انجمن کالج فار ویمن کی۶ طالبات نے امسال یونیورسٹی رینک حاصل کرتے ہوئے انجمن کی شاندار کامیابی درج کرنے کا سلسلہ جاری رکھا ہے۔ان چھ رینک حاصل کرنے والوں میں تین طالبات نے شعبہ آرٹس میں، دو نے شعبہ کامرس میں اور ایک طالبہ نے شعبہ سائنس میں رینک حاصل کرنے میں کامیاب رہی ہیں۔  پچھلے کچھ برسوں سے انجمن کالج فار ویمن کا نہ صرف مجموعی نتیجہ بہت ہی شاندار رہا ہے بلکہ ہر بار کچھ طالبات نے یونیورسٹی رینک حاصل کرکے اپنے لئے اور مادرعلمی کے لئے قابل تحسین کارنامہ انجام دیا ہے۔ 

کالج کی پرنسپال محترمہ رئیسہ شیخ کی جانب سے جاری کیے گئے اخباری بیان کے مطابق مئی /جون 2016 کے فائنل امتحانات میں یونیورسٹی رینک پانے والی طالبات کی تفصیل کچھ یوں ہے:

بی ایس سی فائنل میں آئشوریا گووندرایا نائک نے 3840میں سے 3350مارکس حاصل کرتے ہوئے 87.24 فیصدکے ساتھ کرناٹکا اسٹیٹ ویمنس یونیورسٹی وجیاپورا میں 7واں رینک حاصل کیا۔بی کام فائنل میں یسریٰ بنت محمد شعیب ایم ایس نے87.68فیصد کے ساتھ یونیورسٹی میں چوتھارینک اوراُم حرم بنت محمد اسلم گوائی نے 86.61فیصد اوسطکے ساتھ دسواں رینک حاصل کیا ہے۔

 شعبہ آرٹس میں بھی انجمن کی طالبات یونیورسٹی ٹاپ ٹین فہرست میں شامل رہیں۔ خیرالنساء ضُحیٰ بنت وانیا باشاہ نے 87.41فیصد کے ساتھ دوسرا رینک اور فضا مریم بنت سید حسین ایس ایم 85.89فیصد کے ساتھ چھٹے رینک پر رہیں،جبکہ دُرّہ بنت محمد عظیم اکّیری نے 85.63 فیصد مارکس حاصل کرتے ہوئے آٹھواں رینک اپنے نام کیا ہے۔

 یقیناان طالبات نے اپنی بے پناہ صلاحیتوں سے نمایاں ترین کامیابی حاصل کرکے پورے ضلع شمالی کینرا کے لئے لائق تحسین کارنامہ انجام دیا ہے۔کالج کی پرنسپال، انجمن کے صدر جناب عبدالرحیم جوکاکو، جنرل سکریٹری صدیق اسماعیل اور ایڈیشنل سکریٹری اسحاق شاہ بندری نے طالبات کو مبارکباد پیش کرتے ہوئے ان لکچرارس کی بھی ستائش کی ہے جن کی کوششوں سے کالج کے طلباء ہر سال بہترین کارکردگی کا مظاہرہ کر رہے ہیں۔