اڈپی 16؍فروری (ایس او نیوز) یہاں سے قریب ادیاور میں گرام پنچایت صدر کے داماداور دیگر2 رشتے داروں نے ایک شخص کے گھر میں گھس کر مارپیٹ کی جن میں سے دو کو پولیس نے گرفتار کرلیا جبکہ تیسرا شخص فرار بتایا جاتا ہے۔

بتایاجاتا ہے کہ یہاں پر ایک روڈ کی توسیع کے معاملے میں گرام پنچایت صدرسگندھی کے داماد اور گاؤں والوں کے درمیان کچھ دنوں پہلے تکرار ہوگئی تھی کیونکہ سڑک کی توسیع ہونے پر سگندھی کے گھر کو نقصان پہنچنے والا تھا اور سگندھی کا دامادگری راج اس توسیع میں رکاوٹ پیدا کررہاتھا۔ گاؤں والوں نے گری راج کے خلاف موقف اختیار کیا اور ڈٹ کر کھڑے ہوگئے۔ اس سے ناراض گری راج نے اپنے دوساتھی سنجیوا اور وجیت کے ساتھ مل کر اپنی مخالفت کرنے والوں میں شامل ویڈنال ڈیسوزاکے گھر میں گھس کر مارپیٹ کی۔ ویڈنال کی چیخ و پکار سن کر گاؤں کے لوگ اس کی مدد کو دوڑ پڑے تو حملہ آور اپنی کار چھوڑ کر وہاں سے فرار ہوگئے ۔ اس حملے کی شکایت درج کرنے پر پولیس نے کارروائی کرتے ہوئے وجیت اور سنجیواکو گرفتار کرلیا جو ضمانت پر رہا ہوگئے جبکہ کلیدی ملزم گری راج روپوش ہوگیا ہے اور پولیس اسے تلاش کررہی ہے۔