اُڈپی میں مویشیوں کے بیوپاری حُسین ابّا کے قتل کے معاملے میں گرفتار تین ملزموں کو ملی ضمانت؛ آٹھ کی ضمانت نامنظور
اُڈپی 20/جون (ایس او نیوز) مویشیوں کے بیوپاری حُسین ابا کے قتل کے معاملے میں گرفتار دو لوگوں پولس ہیڈ کونسٹیبل موہن کوتوال اور بجرنگ دل لیڈر پرساد کونڈاڈی کی ضمانت عرضی کو اُڈپی سیشن کورٹ نے منظور کرلیا ہے اسی طرح ایک اورفرار شدہ بجرنگ دل کارکن توکارام کی پیشگی ضمانت بھی منطور کرلی ہے۔ البتہ دیگر آٹھ گرفتار شدگان پولس سب انسپکٹر ڈی این کمار، پولس جیپ ڈرائیور گوپال، وشو ہندو پریشد لیڈر سریش مینڈن عرف سوری، اُمیش شٹی، رتن چیتن عرف چیتن اچاریہ، شائلیش شٹی اور گنیش کی ضمانت کی عرضی کو نامنظور کردیا ہے۔ عدالت نے ان آٹھوں ملزموں کی جوڈیشیل کسٹڈی جون 28 تک ملتوی کردی۔
خیال رہے کہ 30/مئی کو مویشیوں کے تاجر61 سالہ حُسین ابّا پر مبینہ بجرنگ دل کارکنوں نے پولس کی مدد سے حملہ کیا تھا اور اُن کی بری طرح پیٹائی کرتے ہوئے اُن کا بے دردی کے ساتھ قتل کردیا تھا بعد میں ان گئو آتنکیوں نے حُسین ابا کی لاش کو پیرڈور جنگل میں پھینک کر پولس کے ذریعے گھروالوں کو خبر دی تھی کہ حُسین ابا کی لاش جنگل میں پائی گئی ہے۔ پولس اور بجرنگ دل کارکنوں پر اس بات کا بھی الزام ہے کہ بعد میں انہوں نے ان کی موت کو ہارٹ اٹیک قرار دینے کی کوشش کی تھی، مگر پوسٹ مارٹم رپورٹ نے انکشاف کیا کہ ان کی موت دل کا دورہ پڑنے سے نہیں بلکہ سر کو شدید چوٹ لگنے کی وجہ سے ہوئی ہے۔
حُسین ابّا کے قتل کے معاملے میں سریش مینڈن عرف سوری کو اہم ملزم مانا گیا ہے، ان کے کیس کی پیروی ایڈوکیٹ متّارو رتناکر ہیگڈے کررہے ہیں جو ضلع اُڈپی بی جے پی کے بھی صدر ہیں۔ بی جے پی صدر دیگر بجرنگ دل کارکنوں کے معاملات کی بھی پیروی کررہے ہیں۔ البتہ ہیری یڈکا پولس سب انسپکٹر ڈی این کمار، جنہیں اُن کے عہدے سے اب سسپنڈ کردیا گیا ہے، کی پیروی ایڈوکیٹ شانتارام شٹی کررہے ہیں۔ کانسٹیبل موہن کوتوال کی پیروی وجئے کمار شٹی اور جیپ ڈرائیور گوپال کی پیروی ایڈوکیٹ ایم سنجیوا کررہے ہیں۔
سی آئی ڈی ٹیم اُڈپی پہنچی: حُسین ابّا قتل کی چھان بین کی ذمہ داری اب چونکہ سی آئی ڈی کو سونپی گئی ہے، اس تعلق سے پیر کو سی آئی ڈی ٹیم اُڈپی پہنچ گئی ہے جس کی قیادت سی آئی ڈی ڈپٹی ایس پی چندراشیکھر کررہے ہیں۔ سی آئی ڈی ٹیم نے اُڈپی پہنچ کر ہیریڈکا پولس اسٹیشن کا دورہ کرنے کے ساتھ ساتھ موقع واردات پر پہنچ کر بھی جائزہ لیا ہے اور ضروری جانکاری حاصل کی ہے۔