مال لے کر کولہاپور جانے کے دوران لاری سمیت کمٹہ کے دونوں ڈرائیور اچانک لاپتہ؛ کمٹہ کے عوام میں تشویش کی لہر
کمٹہ 28/نومبر (ایس او نیوز) کمٹہ سے تعلق رکھنے والے دو لاری ڈرائیور اپنی لاری سمیت اچانک غائب ہوگئے ہیں، جن کی گمشدگی کی اطلاع پھیلتے ہی کمٹہ کے عوام میں تشویش کی لہر دوڑ گئی ہے۔
بتایا گیا ہے کہ 24/نومبر جمعہ کی شام کو دو چچیرے بھائی محمد اسحاق اور محمد ریحان، جو دونوں ٹرک ڈرائیور ہیں، کوپّل (کرناٹکا) سے لوہے کے پلیٹس بھر کر کولہا پور (مہاراشٹرا) کے لئے نکلے تھے، ان کو اگلے روز یعنی سنیچر صبح آٹھ بجے تک کولہاپور پہنچ جانا چاہئے تھا، مگر اس دوران ٹرک سمیت دونوں غائب ہوگئے ہیں۔ بتایا گیا ہے کہ ان کے موبائل سنیچر سے ہی بند ہیں، جس کی وجہ سے پتہ نہیں چل پارہا ہے کہ آخر یہ دونوں آخر کیسے غائب ہوگئے ہیں، کہاں چلے گئے ہیں اور کے ساتھ آخر کیا ماجرا پیش آیا ہے۔
دونوں کے غائب ہونے کی اطلاع ملتے ہی دونوں کے بھائی سمیت دیگر رشتہ دار ان کی تلاش کے لئے مہاراشٹرا روانہ ہوگئے۔ ساحل آن لائن سے فون پر گفتگو کرتے ہوئے محمد ریحان کے بھائی نوشاد نے بتایا کہ وہ سنیچر کو اپنے بھائیوں کی گمشدگی کی اطلاع ملتے ہی اُن کی تلاش میں پہلے کوپّل پہنچے، یہاں پولس تھانہ میں گمشدگی کی شکایت درج کرائی اور بھائیوں کو تلاش کرتے کرتے مہاراشٹرا کے نیپّانی پہنچ گئے ہیں۔ نوشاد کے مطابق بیلگام سے آگے سنکیشور چیک پوسٹ پر واقع سی سٹی ٹی وی فوٹیج سے پتہ چلا ہے کہ دونوں بھائی ٹرک لے کر سنکیشور چیک پوسٹ سے آگے نکل گئے ہیں، مگر اگلا چیک پوسٹ نیپّانی میں ہے، جہاں کے سی سی ٹی وی کے ذریعے چھان بین کرنے پر پتہ چلا ہے کہ نیپانی چیک پوسٹ پر یہ لوگ نہیں پہنچے ہیں اور نیپّانی پہنچنے سے پہلے ہی ٹرک سمیت دونوں غائب ہوگئے ہیں۔ سنکیشور پولس چیک پوسٹ کے سی سی ٹی وی فوٹیج کے مطابق یہاں سے یہ لوگ رات تین بجے نکلے ہیں، اُس حساب سے ان دونوں کو صبح آٹھ بجے تک کولہاپور پہنچ جانا چاہئے تھا، مگر راستے میں ان کے ساتھ کیا کچھ ہوا ہے اور اب دونوں کہاں ہیں، کچھ پتہ نہیں چل پایا ہے۔ انہوں نے تمام قارئین سے دُعا کی درخواست کی کہ دونوں بھائی صحیح سلامت مل جائیں۔
نوشاد کے مطابق ریحان اور اسحاق مینگلور سے کوئلہ بھر کر کوپّل لے جاتے ہیں، وہاں سے لوہے کی سلاخیں یا دیگر چیزیں ٹرک پر بھر کر مہاراشٹرا لے جاتے ہیں، ہمیشہ کی طرح اس بار بھی دونوں مینگلور سے کوئلہ لے کر پہلے کوپّل پہنچے تھے اور ہمیشہ کی طرح کوپل سے شام قریب چھ بجے کولہاپور کے لئے روانہ ہوئے تھے۔
کوپّل پولس تھانہ میں دونوں کی گمشدگی کے تعلق سے معاملہ درج کیا گیا ہے اور پولس بھی اپنے طور پر ان کی تلاش میں جٹ گئی ہے۔