کاروار10؍جولائی ( ایس اونیوز)ضلع شمالی کینرا کے مختلف مقامات کہیں موسلادھار اورکہیں وقفے وقفے سے بارشوں کا سلسلہ جاری ہے۔ ساحلی علاقے میں تھوڑے تھوڑے وقفے تیز بارش ہورہی ہے۔

سرسی سے ملنے والی رپورٹ کے مطابق دو دن سے موسلا دھار برسات ہوئی ہے۔ گھنے کالے بادلوں کی وجہ سے اس قدر اندھیرا چھایا ہوا تھا کہ موٹر سواریوں کو دوپہر کے وقت بھی ہیڈ لائٹ کی روشنی میں سفر کرنا پڑ رہا تھا۔تیز طوفانی ہواؤں کی وجہ سے کئی مقامات پر درخت زمین سے اکھڑ کر گر گئے ہیں۔مضافاتی علاقوں میں بجلی کی سربراہی میں دقت پید اہوگئی ہے۔ یہاں گزشتہ 24گھنٹوں کے دوران 65ملی میٹر برسات ہوئی ہے۔ سا گر کے علاقے میں بہت ہی زیادہ بارش کی وجہ سے بنواسی علاقے کی واردا ندی ابل پڑی ہے، اور بارش کا سلسلہ یونہی جاری رہنے پر سیلاب آنے کا خدشہ دکھائی دے رہا ہے۔

کچھ ایسی ہی صورتحال سداپور تعلقہ کی بتائی جارہی ہے۔ یہاں گزشتہ 24گھنٹوں کے دوران شہر میں76.4ملی میٹر برسات ہوئی ہے، اور اب تک یہاں 1158ملی میٹر بارش ہونے کی اطلاع ہے۔ریوینیو افسران نے بتایا ہے کہ تعلقہ کے مختلف مقامات پر بارش کی وجہ سے بھاری مالی نقصانات ہوئے ہیں۔