نئی دہلی ، 8؍دسمبر (ایس او نیوز؍آئی این ایس انڈیا)بہارکے وزیراعلیٰ نتیش کمارکوعہدے سے نااہل قراردینے کے مطالبے والی پٹیشن پر سپریم کورٹ جنوری کے دوسرے ہفتے میں سماعت کرے گا۔درخواست گزار ایم ایل شرما نے کہا کہ ان کی طبیعت ٹھیک نہیں ہے اور وہ بحث نہیں کر پائیں گے۔الیکشن کمیشن نے سپریم کورٹ میں حلف نامہ داخل کر کے کہا ہے یہ درخواست سماعت کے قابل نہیں، اس کو مسترد کیا جائے۔ پٹیشن کمزور ہے اور غلط حقائق پر مبنی ہے۔اس میں دی گئی معلومات گمراہ کرنے والی ہے اور یہ عدالتی عمل کا غلط استعمال ہے۔ نتیش کمار نے 2012 اور 2015 میں بہار اسمبلی کا انتخاب نہیں لڑا تھا۔اسی طرح انہوں نے 2013میں بھی بہار قانون ساز کونسل ایم ایل سی کا الیکشن نہیں لڑا، لیکن پتہ نہیں درخواست گزار ایم ایل شرما نے کہاں سے نتیش کمار کے انتخابی حلف نامے حاصل کئے۔اس معاملے سے درخواست گزار کی بنیادی حقوق کی خلاف ورزی نہیں ہوئی ہے اور مفاد عامہ کی عرضی داخل نہیں کی جاسکتی۔درخواست گزار کو الیکشن پٹیشن یا شکایت پولیس کو دینی چاہیے تھی۔یہ درخواست مسترد کی جائے اور درخواست گزار پر بڑا جرمانہ عائد کیا جائے اس سے پہلے نتیش کمار کو بہار وزیر اعلی کے عہدے سے نااہل قرار دینے کے مطالبے والی درخواست پر سپریم کورٹ نے الیکشن کمیشن سے 4ہفتے میں جواب دینے کو کہا تھا۔وکیل ایم ایل شرما نے پٹیشن داخل کر کے کہا کہ 2004 سے 2015 کے دوران نتیش کمار نے حلف نامے میں یہ ظاہر نہیں کیا کہ 1991میں ان پر قتل کے معاملے میں ایف آئی آر درج ہوئی تھی۔عرضی میں دعوی کیا گیا ہے کہ نتیش کمار نے اپنے ایفڈیوٹ میں اس بات کا ذکر نہیں کیا کہ ان کے نام پر قتل کا معاملہ درج ہے، لہٰذا نتیش کمار کو سی ایم عہدے کے لئے نااہل قرار دیا جائے۔پٹیشن میں نتیش کمار کے خلاف قتل کے معاملے میں اعلی سطحی جانچ کرانے کی مانگ کی گئی ہے۔درخواست میں الزام لگایا گیا ہے کہ نتیش نے 2004اور 2015 کے درمیان اپنے حلف نامے میں ان پر قتل معاملے میں ایف آئی آر درج کرنے کا انکشاف نہیں کیا ہے۔پٹیشن کے مطابق نتیش کمار اپنے مجرمانہ ریکارڈ کو چھپانے کے بعد آئینی عہدے پر نہیں رہ سکتے۔