منگلورو،20؍ستمبر(ایس او نیوز)ہندو جاگرن ویدیکے کے ریاستی ذمہ دار اوراپنی اشتعال انگیز تقاریر کے لئے پہچانے جانے والے ہندوتوا لیڈر جگدیش کارنت کے خلاف جنوبی کینرا یونائٹیڈ مسلم آرگنائزیشن نے ضلع ایس پی سدھیر کمارریڈی کو تحریری شکایت دی ہے اور مطالبہ کیا ہے کہ حالیہ دنوں میں جگدیش کارنت نے پتور میں جو بھڑکاؤ بھاشن دیا ہے اس کے خلاف کارروائی کی جائے۔

شکایت میں کہا گیا ہے کہ جگدیش نے پولیس ڈپارٹمنٹ میں موجود ایک مسلم افیسر کے خلاف بہت ہی ذلت آمیز ریمارکس کرتے ہوئے پورے پولیس ڈپارٹمنٹ کی تذلیل کی ہے۔جگدیش نے ایک مخصوص فرقے اور مذہب کو اپنی تقریر میں نشانہ بنایا ہے اور آئندہ فرقہ وارانہ ماحول بگڑنے ، فسادات برپا ہونے اور جان ومال کا نقصان ہونے تک کی دھمکی کھلے عام دے ڈالی ہے۔جگدیش نے تقریر کے دوران "مسلم"، "اسلامائزیشن'، اور "اسلامی جہاد "جیسے الفاظ کا استعمال کرتے ہوئے سماج کے ایک طبقے کے خلاف عوام میں نفرت کا ماحول پیدا کرنے اور فساد پر ابھارنے کی کوشش کی ہے۔

یونائٹیڈ مسلم آرگنایزیشن کے صدر اورسابق میئر کے ایم اشرف کی طرف سے دی گئی شکایت میں کہا گیا ہے کہ پتور اور ضلع جنوبی کینرا میں اب امن اور شانتی کا ماحول بحال ہوچکا ہے ۔ ایسے میں جگدیش کارنت کی طرف سے یہاں فرقہ وارانہ اشتعال انگیزی پیدا کرنے کی کوشش کی جارہی ہے اس لیے جگدیش کے خلاف قانونی کارروائی کی جائے۔