ہائی اسکول او رکالجوں کے امتحانات مقررہ وقت پر ہوں۔سرسی میں اے بی وی پی نے دیا میمورنڈم
سرسی 15؍دسمبر (ایس او نیوز)ریاستی سرکار کی طرف سے ابھی تک وزیر تعلیم کا قلمدان کسی کو نہ دینے اور طلبہ کی تعلیمی زندگی کے ساتھ کھلواڑ کرنے کا الزام لگاتے ہوئے اکھل بھارتیہ ودیارتھی پریشد(اے بی وی پی) کے اراکین نے تحصیلدار کی معرفت میمورنڈم دیا اورمطالبہ کیا کہ ریاست کے پرائمری اور سیکنڈری محکمہ تعلیمات کو تباہ ہونے سے بچایا جائے۔
تحصیلدار دفتر کے باہر بی جے پی کی طلبہ تنظیم اے بی وی پی کے 100سے زائد اراکین جمع ہوئے تھے۔ انہوں نے کہا کہ گزشتہ دو سال پہلے پی یو سی بورڈ کے امتحانی پرچے افشا ہونے کی وجہ سے حکومت کی تذلیل ہوئی ہے۔ پرچے افشا کرنے کے ملزم شیو کمار کے خلاف سخت قانونی کارروائی ہونی چاہیے۔کیونکہ پھر ایک بار کے پی ایس سی امتحانات کے پرچے افشا کرنے کے الزام میں اسے گرفتار کیا گیا ہے۔تعلیم جیسے مقدس پیشے کو ناپاک کرنے اور لاکھوں طالب علموں کی زندگی سے کھلواڑ کرنے والے ملزم کے خلاف ریاستی حکومت جو نرم رویہ اپنا رہی ہے وہ لائق مذمت ہے۔
لیکن اب ریاستی حکومت کے اندرونی جھگڑوں کی وجہ سے ابھی تک وزیر تعلیم کا قلمدان کسی کوبھی سونپا نہیں گیا ہے جبکہ فائنل امتحانات کو بس چند ہی مہینے رہ گئے ہیں۔اس وجہ سے ریاست کے لاکھوں طلبہ کی زندگی کے ساتھ کھلواڑ جیسا معاملہ ہورہا ہے۔
تحصیلدار کو میمورنڈم دیتے وقت اے بی وی پی سکریٹری کملاکر،راجیندرا، گنپتی تیتی اور دیگر طلبہ موجود تھے۔