سکھ فسادات: میرے خلاف نہ کوئی ایف آئی آر اور نہ ہی چارج شیٹ، کمل ناتھ نے کہا،بی جے پی جھوٹ پھیلارہی ہے
بھوپال:17/دسمبر (ایس او نیوز/آئی این ایس انڈیا) مدھیہ پردیش کے وزیراعلیٰ کمل ناتھ نے 1984 کے سکھ فسادات پر اٹھ رہے سوالوں پر جواب دیاہے۔کمل ناتھ نے کہاہے کہ 1984 کے سکھ فسادات میں ان کے خلاف کوئی بھی ایف آئی آر یا چارج شیٹ نہیں ہے۔انہوں نے کہا کہ اب اس مسئلے کواٹھانے کے پیچھے صرف سیاست ہے۔انہوں نے کہاکہ جس وقت میں کانگریس کا جنرل سکریٹری تھا، اس وقت کسی نے اس مسئلے کو نہیں اٹھایا۔آج اس مسئلے کو اٹھایا جا رہا ہے۔آپ سب اس کے پیچھے کی سیاست کو سمجھ سکتے ہیں۔ بتا دیں کہ کانگریس کے سینئر لیڈر سجن کمار کو دہلی ہائی کورٹ میں پیر کو سکھ فسادات میں مجرم پایاگیاہے۔ کورٹ نے سجن کمار کو عمر قید کی سزا سنائی ہے۔آپ کو بتا دیں کہ پورے 34 سال کے بعد کورٹ نے سجن کمار کو سزا ہوئی ہے، جبکہ اس سے پہلے انہیں بری کردیاگیاتھا۔دراصل، سی بی آئی نے 1 نومبر، 1984 کو دہلی کینٹ کے راج نگر علاقے میں پانچ سکھوں کے قتل کے معاملے میں کانگریس لیڈر سجن کمار کو بری کیے جانے کے نچلی عدالت کے فیصلے کو ہائی کورٹ میں چیلنج کیاتھا۔سماعت کے دوران ہائی کورٹ نے پوچھا تھا کہ اسٹیٹ مشینری کیا کر رہی تھی؟ واقعہ دہلی کینٹونمنٹ کے ٹھیک سامنے ہواتھا۔