اڈپی: شیرور مٹھ لکشمی ورا تیرتھا سوامی منی پال اسپتال میں انتقال کرگئے؛ کھانے میں زہر دے کر مارنے کا شبہ؛ صاف شفاف چھان بین کا مطالبہ
اُڈپی 19؍جولائی (ایس او نیوز) مشہور و معروف شیرور مٹھ کے لکشمی وراتیرتھا سوامی(۵۵سال) منی پالاسپتال میں علاج کے دوران انتقال کرگئے ۔ ان کی موت پر شک و شبہ ظاہر کیا جارہا ہے کہ ان کی موت غیرفطری طور پر ہوئی ہے اور شک ہے کہ انہیں زہر دے کر مارا گیا ہے۔
ذرائع سے ملی اطلاع کے مطابق پیر کو سواجی جی مٹھ میں ہی ایک شجرکاری پروگرام میں شریک ہوئے تھے، جس کے بعد انہوں نے بچوں کے ساتھ بیٹھ کر کھانا کھایا تھا، بتایا جارہا ہے کہ کھانے کے بعد ہی اُن کی طبیعت بگڑ گئی تھی اور اُنہیں الٹیاں ہوئی تھی، اگلے روز اُن کے پیٹ میں درد شروع ہونے پر اُڈپی کے گاندھی اسپتال میں داخل کیا گیا، جب تکلیف میں کمی نہیں ہوئی تو کل بدھ کو اُنہیں منی پال کے ایم سی لے جایا گیا، جہاں اُنہیں آئی سی یو میں رکھا گیا تھالیکن علاج کارگر نہیں ہوااور شام تک ان کی صحت بگڑتی گئی اور بالآخر انہوں نے دم توڑ دیا۔
لکشمی ورا تیرتھا سوامی جی کی موت کی خبر پھیلتے ہی اڈپی کرشنا مٹھ سے منسلک تمام تعلیمی اداروں میں چھٹی کا اعلان کردیا گیا۔ شیرور میں دکانیں بند کردی گئیں اور سیکڑوں افراد کو رنج و غم کا اظہار کرتے ہوئے دیکھا گیا۔
لکشمی ورا تیرتھا سوامی کی پیدائش 1964میں ہوئی تھی او رانہوں نے 1971میں سنیاس لیا تھا۔ وہ اپنے بھکتوں میں بہت ہی مقبول سوامی تھے۔ حالیہ اسمبلی الیکشن کے دوران انہوں نے سیاسی امیدوار بننے کا بھی اعلان کیا تھا۔ اس کے علاوہ حالیہ دنوں میں اڈپی کرشنامٹھ کے مختلف سوامیوں کے درمیان رسہ کشی اور تنازع کی خبریں آنے لگی تھیں۔اب اچانک سوامی جی کی موت واقع ہونے پر بعض حلقوں کی طرف سے شکو ک و شبہات کا اظہار کیا جارہا ہے۔
الیکٹرانک میڈیا میں آنے والی خبروں کے مطابق سوامی جی کے وکیل کرن مرڈیشور کے حوالے سے یہ خبریں آرہی ہیں کہ انہوں نے پُتّیگے سوامی جی کو چھوڑ کر بقیہ چھ سوامیوں کے خلاف فوجداری مقدمہ داخل کرنے کی تیاری کی تھی اور اپنی جان کو خطرہ ہونے کی بات کہی تھی۔اس لئے سوامی جی کی موت کے سلسلے میں غیر جانبدارانہ تحقیقات کا مطالبہ کیا جارہا ہے۔
ابتدائی رپورٹ کے مطابق سوامی جی کی موت غذائی سمّیت (فوڈ پوائزننگ) سے پیٹ کے اندرخون بہنے (بلیڈنگ) سے ہوئی ہے۔ جبکہ ایک خبر یہ بھی ہے کہ وہ تنفس کے امراض کا بھی شکار تھے۔ موت کے حقیقی اسباب جاننے کے لئے سوامی جی کی پوسٹ مارٹم رپورٹ کا انتظار کیا جارہا ہے۔