دبئی میں پاکستان کے 25قیدیوں کی رہائی کے لیے آگے آئے شاہد آفریدی
دبئی، 31/جنوری (ایس او نیوز/آئی این ایس انڈیا)انسانیت نوازی کی ایک اور بہترین مثال پیش کرتے ہوئے پاکستان کے سابق کرکٹ کپتان شاہد آفریدی دبئی کی جیلوں میں چھوٹے موٹے مالی جرائم کے الزام میں بند اپنے ملک کے 25قیدیوں کی رہائی کے لیے 21ہزار ڈالر دیں گے۔دبئی پولیس نے بتایا کہ آفریدی کی طرف سے ان کا مالی جرمانہ اداکرنے کے بعد پاکستان کے 25قیدیوں کو دبئی کی جیلوں سے رہاکر دیا جائے گا۔’خلیج ٹائمز‘نے دبئی پولیس کے انسانی حقوق کے ڈائریکٹوریٹ جنرل کے ڈائریکٹر جنرل ڈاکٹر محمد المر کے حوالے سے کہا کہ آفریدی نے چھوٹے موٹے مالی جرائم کے مجرم قیدیوں کی رہائی کے لیے جرمانہ کی ادائیگی کی پیشکش کی ہے۔پولیس نے بتایا کہ قیدیوں کی رہائی کے لیے آفریدی 80000درہم(21781ڈالر)ادا کریں گے۔رپورٹ کے مطابق،آفریدی نے دبئی پولیس سے کہا ہے کہ وہ زیادہ قیدیوں کی رہائی میں مدد کے لیے اگلی بار دو لاکھ درہم ادا کریں گے۔