بھٹکل تعلقہ میں مسلسل بارش سے ندی کنارے پر خطرہ :163ملی میٹر بارش
بھٹکل :14/ اگست (ایس اؤ نیوز)بھٹکل تعلقہ میں پچھلے دو تین دنوں سے مسلسل برستی بارش سے ندی نالے پوری تاب سے بہنے کے نتیجےمیں عام زندگی مفلوج ہوگئی ہےاور نشیبی علاقوں میں پانی بھر جانے سے عوام پریشانی میں مبتلا ہونےکی اطلاعات موصول ہوئی ہیں۔
مرڈیشور ، بینگرے ، شنی ہتل سمیت مختلف مقامات پر نشیبی زرعی زمینات پانی میں ڈوب گئے ہیں۔ تعلقہ کی وینکٹاپور نالے کے کنارے کے گھروں میں پانی گھسنے کی خبریں ہیں۔ جدھر دیکھیں ادھر پانی ہی پانی بھر گیا ہے ۔ چوتھنی کی ندی خطرے سے اوپر بہنے سے کنارے پر بسے مکینوں کو پیشگی طورپر بیدار رہنے اور محفوظ مقامات پر منتقل ہونے مقامی انتظامیہ ہدایات جاری کرچکی ہے۔ ماہی گیر ساحل پر کھڑے ہوکر سمندر کے خاموش ہونےکے انتظارمیں ہیں۔ کئی جگہوں پر ٹرافک متاثر ہوئی ہے۔
پیر کی صبح سے منگل کی صبح تک تعلقہ میں 163ملی میٹر بارش کی پیمائش کی گئی ہے، اب تک کل پیمائش 2673.5ملی میٹر بتائی گئی ہے۔ حالات پر کڑی نظر رکھتے ہوئے تحصیلدار وی این باڈ کر نے ولیج اکاؤنٹنٹ سمیت دیگر عملے کو اپنے مرکزی مقام سے کہیں بھی نہ جانے کا حکم جاری کیا ہے۔ جالی میں تیز ہواؤں اور لگاتار بارش کے چلتے مادیو ہونپا نائک کے گھر پر درخت گر نے سے کافی نقصان پہنچا ہے۔ تحصیل دفتر کا عملہ جائے وقوع پہنچ کر نقصانات کا معائنہ کیا ہے۔