تہران؍نئی دہلی،19جولائی(ایس او نیوز؍آئی این ایس انڈیا) ایران کے شہر بندر عباس میں قدیم ہندو مندر ایک اہم قدیمی باقیات ہے اوراس شہر کا دورہ کرنے والے اس مندر میں ضرور جاتے ہیں۔انٹرنیٹ پر بندر عباس تلاش کرنے پر اس شہر کا مندر ضرور سامنے آتا ہے۔یہ مندر 129سال پرانا ہے اورسال1310ہجری میں بنایا گیا تھا۔مندر شہر کے مرکز میں ایک بھیڑ بھاڑ والے بازار کے سامنے واقع ہے اور شہر کی بلند عمارتوں کے درمیان بھی اپنی شناخت بنائے ہوئے ہے۔یہ مندر قدیم وقت سے ایران اور ہندوستان کے لوگوں کے اچھے باہمی تعلقات کی جیتی جاگتی مثال ہے۔بندر عباس کے مرکز میں محفوظ رہ جانے والی قدیم عمارتوں میں سے ایک یہ مندر ہے۔اس مندر کو اسلامی انقلاب کی کامیابی کے بعد سال 1998میں ایران کے قومی باقیات کی فہرست میں درج کیا گیا۔گزشتہ سال اس مندر کی مرمت کے منصوبے کی منظوری دی گئی اور اس کے لئے تقریبا 86کروڑ ریال کا بجٹ مخصوص کیا گیا۔ایران کے ہرمذگان صوبے کے سیاحت اور صنعت محکمہ نے اس مندر کی مرمت کے لئے ملک کے ممتاز معمار وں سے رابطہ کیا۔فخری دانشپور جو قدیمی باقیات کے میدان میں ایران کے سب سے بڑے تلاش کرنے والوں میں سے ایک ہیں، کہتے ہیں کہ ان کے پاس بڑی تعداد میں بندر عباس کے مندر کے چالیس سال پرانی تصاویر ہیں جن سے اس کی مرمت میں مدد ملے گی۔ان کا کہنا ہے کہ اہم اور تاریخی عمارتوں کی مرمت میں مزید حساسیت سے کام لینا چاہئے کیونکہ اگر ان کا اصل ڈھانچہ بگڑ گیا تو پھر ہم اپنے آپ کو معاف نہیں کر سکتے۔انہوں نے بتایا کہ اس مندر کی تعمیر کے لئے حکومت کی جانب سے دیگر ایک عرب ریال کی مدد دی گئی ہے اور ہمیں امید ہے کہ جلد ہی اس کی مرمت کا کام مکمل ہو جائے گا۔