بھاری بارش کو دیکھتے ہوئے کل منگل کو مینگلور میں بھی اسکولوں اور کالجوں میں چھٹی؛ پہاڑی کھسکنے سے مڈکیری جانے کا راستہ بند
مینگلور 13/اگست (ایس او نیوز) گذشتہ چار روز سے جاری زبردست بارش کا سلسلہ آج بھی جاری رہا جس کو دیکھتے ہوئے ضلعی انتظامیہ نے کل منگل کو بھی ضلع جنوبی کینرا کے سبھی اسکولوں اور کالجوں میں چھٹی کا اعلان کیا ہے۔اُدھر ضلع جنوبی کینرا کے سولیا میں اسٹیٹ ہائی وے پر پہاڑی کھسکنے سے پوری سڑک بند ہوگئی ہے، جس سے مینگلور سے مڈکیری کا رابطہ منقطع ہوگیا ہے۔
مینگلور کے ساتھ ساتھ پڑوسی علاقوں کورگ، مڈکیری، چکمنگلور، داونگیرے، ہاسن، اُڈپی، کنداپور، بھٹکل، ہوناور، کمٹہ، انکولہ، کاروار، یلاپور، سرسی ، سداپور، شموگہ وغیرہ علاقوں میں بھی زبردست بارش کی خبریں موصول ہوئی ہیں اور اکثر علاقوں میں کل منگل کو اسکولوں میں چھٹیوں کا اعلان کیا گیا ہے۔
خیال رہے کہ مینگلو رمیں سنیچر اور پیر کو بارش کی وجہ سے اسکولوں اور کالجوں میں چھٹی ڈکلیر کی گئی تھی، جبکہ اتوار کو ہفتہ واری چھٹی کی بنا پر اسکول اور کالجس بند ہی رہتےہیں، اب بارش کے تیور کم نہ ہونے کے آثار کو دیکھتے ہوئے کل منگل کو بھی چھٹی کا اعلان کیا گیا ہے۔ اس طرح یہاں سنیچر سے کل منگل تک لگاتار چاردن اسکول اور کالجس بند ہیں۔ خدشہ ظاہر کیا جارہا ہے کہ بھاری بارش کا سلسلہ اگر کل بھی اسی طرح جاری رہا تو بدھ کو یوم آزادی کی تقریب میں بالخصوص اسکولی بچوں کو سخت پریشانی ہوسکتی ہے۔
سولیا میں پہاڑی کھسک گئی: مینگلور سے مڈکیری کو جوڑنے والی سڑک پر سولیا اسٹیٹ ہائی وے پر پہاڑی کھسک جانے سے پوری سڑک بند ہوگئی ہے۔ ذرائع سے ملی اطلاع کے مطابق مڈکیری کو جوڑنے والی سڑک پر آج دوسری مرتبہ پہاڑی کھسکنے کی واردات پیش آئی ہے۔ بتایا گیا ہے کہ مڈکیری کے قریب مدےناڈو میں اتوار رات کو شروع ہونے والی زبردست بارش سے راستے کنارے واقع پہاڑی کھسک گئی تھی جس کی بنا پر بنگلور،تمل ناڈو اور میسور کی طرف جانے والی سبھی سواریوں کو کُشال نگر سے بسیل ہوتے ہوئے شرڈی گھاٹ کے راستے سے گذاراجارہا تھا، اُدھر سے مینگلور کی طرف آنے والی سواریوں کو بھی اُسی روٹ پر موڑا گیا تھا۔ بتایا گیا ہے کہ سولیا میں تیز رفتاری سے سڑک کی صفائی کا کام جاری ہی تھا کہ آج پیر کو اُسی جگہ پر پھر پہاڑی کھسک گئی ہے اور مٹی کے ڈھیر نے پوری سڑک کو ڈھانپ دیا ہے۔ پیر شام تک جے سی بی کی مدد سے سڑک کی صفائی کا کام جاری تھا اور بتایا گیا تھا کہ بھاری بارش کے بائوجود رات بھر کام جاری رہے گا ۔
شرڈی گھاٹ پر بھی چٹان کھسک گئی: اُدھر سکلیشپور میں بھی بھاری بارش کی وجہ سے نیشنل ہائی وے 75 پر پہاڑی پر سے چٹان کھسکنے کی واردات پیش آئی ہے۔ بتایا گیا ہے کہ آج پیر دوپہر قریب بارہ بجے اچانک چٹان کھسک گئی اور قریب سو میٹر روڈ پر ایسے گرگئی کہ پوری سڑک بند ہوگئی ہے۔ بتایا گیا ہے کہ مٹی کو ہٹانے کا کام تیز رفتاری کے ساتھ انجام دیا جارہا ہے مگر جیسے جیسے مٹی نکالی جاتی ہے، زبردست بارش کی وجہ سے پہاڑی پر سے مٹی کے بڑے بڑے تودے مزید گرتے جارہے ہیں۔بتایا گیا ہے کہ پہاڑ مزید کھسکنے کے خدشات کو دیکھتے ہوئے بالاخر یہ سڑک سواریوں کے لئے بند کردی گئی ہے۔