دہلی میں پٹرول پمپ بند، ٹیکسی۔آٹو کی ہڑتال سے پریشانیوں کاسامنا، کجریوال نے بی جے پی کوٹہرایا ذمہ دار
نئی دہلی22اکتوبر(ایس او نیوز؍آئی این ایس انڈیا) دہلی حکومت کے پٹرول، ڈیزل پر و یٹ میں کمی سے انکار کی مخالفت میں آج قومی دارالحکومت کے 400 پٹرول پمپ اور ان سے منسلک سی این جی پمپ بند رہے۔ دہلی پٹرول ڈیلرس ایسوسی ایشن نے بند کا اعلان کیا تھا۔
وزیر اعلی اروند کجریوال نے بی جے پی پر پیٹرول پمپ مالکان کو آپ حکومت کے خلاف ہڑتال پر جانے کے لئے دھمکانے کا الزام لگایا ہے۔ جھجھر ضلع کے بیری قصبے میں سرکاری اسکولوں کا معائنہ گرد جلسہ عام خطاب کرنے پہنچے وزیراعلی کجریوال نے کہا کہ بی جے پی پٹرول پمپس پر چھاپہ ماری کا دباؤ بنا کر ہڑتال کروا رہی ہے۔ مودی نے تیل کے ریٹ بڑھائیں ہیں، وہی کم کریں۔وزیر اعلی نے یہ بھی کہا کہ ان کی حکومت پٹرول اور ڈیزل کو جی ایس ٹی کے تحت لانے کا مطالبہ کرتی ہے۔ انہوں نے یہ بھی دعوی کیا کہ مرکز کی مودی حکومت کی طرف سے من مانے ٹیکس لاگو کئے جانے کی وجہ سے پٹرول اور ڈیزل کے دام بڑھے ہیں جبکہ لوگوں کو راحت دینے کے لئے ان کے دام کم ہونے چاہئے۔
دہلی کے وزیر اعلی اروند کیجریوال نے اپنی طرف سے پٹرول، ڈیزل کے دام میں کوئی کٹوتی نہیں کی اور دہلی والوں کو کسی طرح کی اضافی راحت نہیں ملی جس کے خلاف آج پٹرول پمپ بند رہے۔ اس ہڑتال سے جہاں عام لوگوں کو دقت کا سامنا کرنا پڑا اور لوگ مختلف جگہ پٹرول پمپ پر بھٹکتے نظر آئے۔وہیں آج آٹو اور ٹیکسی یونینوں کی بھی ہڑتال رہی جس کی وجہ سے لوگوں کو زیادہ دقتیں اٹھانا پڑی ۔ دہلی حکومت کی پالیسیوں کے خلاف پیر کو آٹو رکشہ اور ٹیکسی یونینوں نے ہڑتال میں جانے کا فیصلہ کیا تھا۔ ایسوسی ایشن کا الزام ہے کہ حکومت کی غلط نقل و حمل پالیسیوں اور کیب گروپوں کے کم رینٹل لینے کے باعث آٹوز اور ٹیکسی ڈرائیوروں کو اپنی ملازمتوں سے ہاتھ دھونا پڑرہا ہے ۔