کشمیر میں حالیہ تشدد میں نوجوان کی موت، ہلاکتوں کی تعداد 66تک پہنچی
سری نگر ، 24؍اگست(ایس او نیوز/آئی این ایس انڈیا)جنوبی کشمیر کے پلوامہ ضلع میں مظاہرین اور سیکورٹی فورسز کے درمیان ہوئے تازہ جھڑپوں میں آج ایک نوجوان کی موت ہوگئی۔یہ واقعہ وزیر داخلہ راج ناتھ سنگھ کے آج یہاں صورت حال کا جائزہ لینے کے لیے پہنچنے کے دن ہی واقع پیش آیا۔نوجوان کی موت کے ساتھ ہی وادی کشمیر میں جاری بدامنی میں ہلاک شدگان کی تعداد بڑھ کر 66تک پہنچ گئی ہے۔ایک پولیس افسر نے بتایاکہ سینے میں پلاسٹک کی گولی لگنے کی وجہ سے زخمی ہوئے عامر بشیر کو یہاں ایس ایم ایچ ا یس اسپتا ل لایاگیالیکن ڈاکٹروں نے اسے مردہ قرار دے دیا۔انہوں نے بتایا کہ نوجوان پلوامہ ضلع میں پوہو گاؤں کا رہائشی تھا جہاں آج صبح سیکورٹی فورسز اور مظاہرین کے درمیان تازہ جھڑپیں ہوئیں ۔اس تازہ جھڑپ میں بہت سے دوسرے لوگوں کے بھی زخمی ہونے کی اطلاع ہے۔جنوبی کشمیر میں اننت ناگ ضلع کے کوکیرناگ علاقے میں سیکورٹی فورسز کے ساتھ تصادم میں حزب المجاہدین کے کمانڈر برہان وانی کی ہلاکت کے ایک دن بعد 9 جولائی سے شروع ہوئے مظاہروں کے دوران 66لوگوں کی موت کے علاوہ دیگر کئی ہزار افراد زخمی ہوئے ہیں۔