بھٹکل 14؍ستمبر (ایس او نیوز) تعلقہ پنچایت صدر ایشور نائک نے تنبیہ کرتے ہوئے کہا ہے کہ پنچایت راج محکمہ کے تحت سابق رکن اسمبلی کے ذریعے منظور کروائے گئے منصوبوں میں ٹینڈر طلب کیے جانے کے بعد پھر تبدیلی کی جاتی ہے تو اس سے ہونے والی مشکلات کے لئے سرکاری افسران ہی ذمہ دار ہونگے۔

ایشور نائک نے تعلقہ پنچایت کے پہلے مرحلے کی کے ڈی پی میٹنگ میں صدارت کی اور پنچایت راج انجینئر کی رپورٹ پیشی کے دوران مداخلت کرتے ہوئے کہاکہ: ’’سابق ایم ایل اے نے کہاں اور کونسے منصوبوں کی ضرورت ہے اس بات کا پتہ لگانے کے بعد وہ منصوبے منظور کروائے تھے۔اب ان کی غیر موجودگی میں اگر ان منصوبوں میں تبدیلی کی جاتی ہے تو پھر آئندہ مشکلات پیدا ہونگی۔ اور اس طرح کی کوئی مشکل پیش آتی ہے تواس کے لئے متعلقہ محکمہ کے افسران ہی پوری طرح ذمہ دار ہونگے۔

جب تعلقہ ہیلتھ آفیسر ڈاکٹر مورتھی راج بھٹ نے اپنی رپورٹ پیش کی تو اسٹانڈنگ کمیٹی کی صدر میناکشی جٹپّا نائک نے اس بات پر سوال اُٹھایا کہ پاگل کتے کے کاٹنے پر لگائے جانے والے انجکشن تعلقہ اسپتال میں موجود کیوں  نہیں ہیں۔ انہوں نے کہا کہ مریضوں کو بڑی قیمت دے کر باہرموجود نجی دکانوں سے یہ انجکشن خریدنا پڑرہا ہے۔ انہوں نے مطالبہ کیا کہ اس ضمن میں ضروری اقدامات اُٹھائے جائیں  اور عوام کو باہر سے انجکشن خریدنے کا جو خرچ آرہا ہے اسے محکمہ صحت کی طرف سے اداکیا جائے۔

اس کے علاوہ مختلف محکمہ جات کی طرف سے جاری سرگرمیوں اور دستیاب سہولتوں کی تفصیلی رپورٹس پیش کی گئیں۔اس موقع پر محکمہ جاتی افسران کے علاوہ تعلقہ پنچایت چیف ایکزیکٹیو افیسرسی ٹی نائک موجود تھے۔