کاروار:22؍مارچ (ایس او نیوز)  اپریل مئی میں منعقد ہورہے لوک سبھاانتخابات کو صاف شفا ف رکھنے  کے لئے شہری اور گاؤں کی سطح پر پہلی مرتبہ 206سی سی ٹی وی کیمروں کی نصب کاری کرتے ہوئے انتخابات کی نگرانی کی جائے گی۔

 شمالی کینرا پارلیمانی حلقہ کے 12شہروں کے میونسپالٹی حدو د میں سی سی ٹی وی کیمرے نصب کئے گئے ہیں۔ کاروار میں بدھ کے روز سے سی سی ٹی وی کیمرے اپنا کام شروع کریں گے۔ ضلع الیکشن کمشنر کے دفتر سےہی پورے انتخابی سرگرمیوں پر نگاہ رکھی جائے گی۔گاؤں کے علاقوں میں سی سی ٹی وی کیمروں کی نصب کاری سے انتخابی اشتہاری مہم سمیت تمام سرگرمیوں پر نظر رکھنے میں مدد ملے گی۔

بھٹکل شہری علاقےمیں سب سے زیادہ یعنی 35سی سی ٹی وی کیمرے اور یلاپور پٹن پنچایت حدود میں سب سے کم یعنی 5سی سی ٹی وی کیمروں کی نصب کاری کی گئی ہے۔ کلی طورپر لوک سبھا انتخابات کی سرگرمیوں پر چیل کی نظر رکھی جارہی ہے۔ کارور میں 23،سرسی میں 18،ڈانڈیلی میں 19،کمٹہ 17،انکولہ 9،ہلیال 28،ہوناور 20،سداپور 18،منڈگوڈ 15،بھٹکل تعلقہ جالی پنچایت حدود میں 5کیمرے لگائے گئے ہیں۔

اسی طرح ضلع میں کل 30چک پوسٹ قائم کئے گئے ہیں۔ ہرایک چک پوسٹ پر سی سی ٹی وی کیمروں سے بھی نگرانی ہوگی۔ ضلع کے 10شدید حساس چک پوسٹوں کی راست ڈپٹی کمشنر کے دفتر سے نگرانی رکھی جائے گی۔ اس کے علاوہ قومی شاہراہ پر جانچ ٹیمیں متحرک رہیں گی۔ 30چک پوسٹوں174ٹیمیں دن کے 24گھنٹے تین شفٹوں میں خدمات پر مامور رہیں گی۔ یہ سب مشترکہ ٹیمیں ہیں جس میں  پولس ، فاریسٹ، ایکسائز، تحصیل محکمہ جات کے افسران اور ٹرانسپورٹ محکمہ کے افسران بھی شامل ہیں۔

ڈی سی ٹیم کا معائنہ :بین ریاستی سرحد ی علاقے گوا اور اترکنڑا ضلع کے ماجالی، جوئیڈا، پاپیلی ، ڈانڈیلی حدود کے بھارچی، کئیگا کراس، بارے کراس کو ڈپٹی کمشنر ڈاکٹر ہریش کمار، ضلع پنچایت سی ای اؤ محمد روشن ، آئی اےایس پروبیشنری دلیش سسی کی ٹیم ملاقات کرتے ہوئے تیاریوں کا جائزہ لیا۔ اس موقع پر ڈی سی الیکشن آفیسران کو ہدایات دیں کہ غیر قانونی انتخابی سرگرمیوں کا باریکی سے جائزہ لیااور کیس درج کریں۔ اس کے ساتھ ساتھ سیاحوں کو ہراساں یا پریشان نہ کرنے کی بات کہی۔