بھٹکل تعلقہ کے مرڈیشور ریلوے اسٹیشن کے قریب سڑی ہوئی حالت میں نامعلوم شخص کی نعش برآمد: خود کشی یا قتل ؟
بھٹکل:15/مئی (ایس اؤنیوز)مرڈیشور ریلوے اسٹیشن کے پیچھے کنی کریشر کے قریب پیر کی شام سڑی ہوئی حالت میں ایک انجان نعش کا پتہ چلا ہے، لاش ایک غیر استعمال شدہ عمارت کے کمرے کے اندر پڑی ہوئی تھی، جبکہ نعش کےقریب 25/30 قدم کے فاصلے پر زہر کی ایک بوتل بھی پولس نے برآمد کی ہے ، جس سے پولس کو شبہ ہے کہ یہ خود کشی کا معاملہ ہوسکتا ہے۔
مہلوک ٹی شرٹ اور جینس پیانٹ میں ملبوس ہے، 35-36سال کی عمرکا اندازہ لگایا گیا ہے ۔نعش سے بدبو آرہی تھی اور ظاہر ہورہا تھا کہ اس شخص کو مرے ہوئے تین دن یا اس سے زائد کا عرصہ گذر چکا ہے، چہرے پر چند زخم دیکھ کر مقامی لوگ اسے قتل قرار دے رہے ہیں، البتہ یہ قتل ہے یا خودکشی ہے، اس بات کا پتہ پولس کی جانچ کے بعد ہی چل سکے گا ۔ عوام اس بات کا شبہ ظاہر کررہے ہیں کہ پولس کی چھان بین کا رُخ موڑنے کے لئے کوئی بھی شخص زہر کی بوتل لاش کے قریب پھینک سکتا ہے۔
مہلوک کے دائیں ہاتھ میں موجود موبائیل کو پولس نے ضبط کرلیا ہے، موبائیل نمبر کا پتہ چلنے کے بعد مہلوک کی شناخت ہونے کے امکانات ہیں ۔ پولس نے جائے وقوع کا معائنہ کرنے کے بعد مرڈیشور پولس تھانے میں کیس درج کرلیا ہے اور جانچ جاری ہے۔