ہوناور:11/ دسمبر(ایس اؤنیوز)گذشتہ چار پانچ دنوں سے فرقہ وارانہ فسادات سے ہوناور شہر کے حالات بہت ہی سنگین موڑ پر ہیں۔ اسکول ، کالج ، دکانیں وغیرہ سب چار دنوں سے  بند ہیں ،  ماحول سے پریشان ہوکر عوام  اب گھروں سے باہر نکلنےمیں خوف محسوس کررہے ہیں ،ایسے میں  ہلاک شدہ نوجوان پریش میستا کے گھروالوں سے عوامی نمائندوں نے  ملاقات کرتے ہوئے انہیں دلاسہ دیا ہے  اور مالی تعاون بھی پیش کیا ہے۔

معصوم نوجوان پریش میستا کی ہلاکت پر ہر کوئی سوگوار ہے۔ پریش کے ہلاکت کی خبر ملتے ہی بھٹکل ہوناور حلقہ کے رکن اسمبلی منکال وئیدیا نے ضلع نگراں کار وزیر آر وی دیش پانڈے ،کمٹہ کی رکن اسمبلی شاردا شٹی ، ضلع پنچایت صدر جئے شری موگیر اور ضلع ڈپٹی کمشنر وغیرہ  پریش میستا کے گھر پہنچ کر والدین سے ملاقات کرتے ہوئے انہیں صبر کی تلقین کی ۔ مہلوک کے گھروالوں کو وزیر دیش پانڈے نے انفرادی طورپر 1لاکھ روپئے کی مدد  بھی کی اور منکال وئیدیا نے بھی اپنی طرف سے مدد کرنے کا وعدہ کیا۔ اس موقع پر وزیر دیش پانڈے نے کہاکہ معاملے کی جلد  جانچ کرتے ہوئے انصاف دلایا جائے گا اور سرکارکی طرف سے بھی ہر ممکن تعاون پیش کیا جائے گا ۔ انہوں نے یہاں بات کرتے ہوئے کہاکہ حالات کو قابو میں رکھنے اور شہر میں امن کو بحال کرنے میں پولس نے حد سے زیادہ محنت و مشقت کی ہے، بد قسمتی سے معصوم نوجوان  کو کھونا پڑاہے۔ انہوں نے یقین دلایا کہ  جس کسی نے بھی یہ کام کیا ہے ان کے خلاف سخت کارروائی کی جائے گی۔  انہوں نے ہوناور کے  عوام سے اپیل کی کہ امن کو برقراررکھنے میں تعاون کریں ۔

منکال وئیدیا کی مدد : موصولہ اطلاعات کے مطابق فسادات کے دوران زخمی ہوکر   اُڈپی آدرش اسپتال میں علاج کےبعد شفایاب ہونے والے  نرسمہا میستااسپتال کے اخراجات ادا نہ کرنے  سے دسچار ج نہیں ہوئے تھے۔  رات 10بجے جب اس کی اطلاع رکن اسمبلی منکال وئیدیا  کو ملی تو انہوں نے اسپتال کا پورابل ادا کرکے نرسمہا میستا کی مشکل و پریشانی کو دور کیا۔ اسپتال سے نرسمہا میستا سیدھے منکال وئیدیا  کے گھر پہنچ کر اُن سے ملاقات کرتے ہوئے شکریہ اداکیا۔

نقصان دہ نقصان ٹمپو کے لئے مدد کی یقین: فسادات کے دوران نقصان زدہ ٹمپو کے مالکان تکنیکی طورپر کیس درج کئے بغیر انشورنس کی سہولت حاصل  نہیں کر  سکتے تھے۔جس پر  ٹمپو سنگھا کے صدر ناگراج یاجی نے بھٹکل کے رکن اسمبلی منکال وئیدیا سے ملاقات کی اور ٹمپو مالکان کی  مشکلات کو بیان کیاتو رکن اسمبلی نے انہیں یقین دہانی کرائی کہ وہ ٹمپوئوں کی  درستگی  کے لئے اپنی جانب سے ہرممکن تعائون دیں گے۔ا  س سلسلے میں بات کرتےہوئے ٹمپو سنگھا کے صدر ناگراج یاجی نے کہاکہ معاملے کو سیاسی طورپر استعمال کئے بغیر فسادات کے دوران جو کچھ نقصانات ہوئے ہیں انسانیت کے ناطے رکن اسمبلی منکال وئیدیا کا تعاون کرنا قابل  ستائش ہے۔