اُلال میں کار اُلٹ گئی، بس کی زد میں آکر بائک سوار ہلاک
منگلورو:29/ جولائی(ایس او نیوز)جمعہ کو اُلال پولس تھانہ حدود کے کوٹیکار میں تین مختلف سواریاں حادثے کا شکار ہوگئیں نتیجے میں بائک سوارکو اپنی جان گنوانی پڑی۔مرنے والے بائک سوار کی شناخت ماڈور ، ہری بڈوانا کے مکین نوین اُدئیے کمار (53)کی حیثیت سے کی گئی ہے۔ نوین کے متعلق بتایا گیا ہے کہ وہ پرسٹیج اسکول میں طلبا کو تیراکی کی تربیت دیا کرتاتھا۔
بتایا گیا ہے کہ ایک اینوا کار منگلورو سے کیرلا کی طرف جارہی تھی کہ تیز رفتاری کی بنا پر کاربے قابو ہوکر کوٹیکار کے اڈکاکے قریب پلٹا کھاگئی اورسڑک کے دوسری طرف جاگری۔ اس موقع پر دوسری سڑک سے نوین مینگلور کی طرف جارہا تھا، اچانک کاراُلٹ کر اس کے سامنے گرنے سے اس کی بائک کار سے ٹکراگئی ۔ ٹکر لگتے ہی نوین روڈ پر جاگرا اور اس دوران پیچھے سے آنے والی روٹ نمبر 42 والی بس نے نوین کوٹکردے دی۔ حادثے میں نوین جائے وقوع پر ہی ہلاک ہوگیا۔ موصولہ اطلاعات کے مطابق کار کے کچھ مسافر بھی زخمی ہوئے ہیں جنہیں علاج کے لئے اسپتال میں داخل کیا گیا ہے۔