رام مندر کی راہ میں رکاوٹ پیدا کرنے والے سنی مسلمانوں کا انجام بھی بابری مسجد جیسا کردیا جائے گا:پرمود متالک کی دھمکی
منگلورو 28؍نومبر (ایس او نیوز) منگلورو کے قریب موڈ شیڈّو نامی مقام پر شیواجی کی مورتی نصب کرنے کی تقریب کے دوران سری رام سینا کے چیف پرمود متالک نے اپنی عادت کے مطابق ایک متنازعہ بیان دیتے ہوئے ملک کے سنّی مسلمانوں کو دھمکی دی ہے کہ اگر انہوں نے رام مندر کی تعمیر میں رکاوٹ پیدا کی تو ان کو بھی بابری مسجد کی طرح برباد کردیا جائے گا۔
پرمود متالک نے حال ہی میں اڈپی میں اختتام پزیر ہونے والے دھرم سنسد اجلاس کا حوالہ دیتے ہوئے کہا کہ وہاں پر ہزاروں سادھوسنتوں نے ایک سُر میں اس بات کا وعدہ کیا ہے کہ آئندہ ایک سال کے اندرایودھیا میں رام مندر تعمیر ہوجائے گا۔ ہم اس وعدے پر بھروسہ کرتے ہیں۔ دوسری طرف یو پی میں شیعہ مسلمانوں نے وزیر اعلیٰ آدتیہ ناتھ یوگی سے ہاتھ ملایا ہے اور رام مندر تعمیر کرنے کی حمایت کرتے ہوئے دس کروڑ روپے کی امداد بھی دینے کا اعلان کیا ہے۔ لیکن سنّی مسلمان اس راستے میں رکاو ٹ پیدا کررہے ہیں۔متالک نے دھمکی آمیز لہجے میں چیختے ہوئے کہا کہ"رام مندر کی تعمیر ہندوؤں کا حق ہے، کوئی بھیک نہیں ہے۔ اگرمسلمانوں کو ہندوؤں کے ساتھ بھائی بھائی بن کر رہنا ہے تو پھر عدالت سے مقدمہ واپس لے کر رام مندر کی تعمیر کے لئے ہندوؤں کا ہاتھ بٹانا ہوگا ۔ ورنہ اگر بابر بابر کہتے رہوگے تو پھر بابری (مسجد) کی طرح تم کو بھی مٹادینے کی طاقت ہمارے اندر موجودہے ،یہی بات ثابت کرنے کے لئے ہم نے شیواجی کی مورتی نصب کی ہے۔"