جنوبی کینرا میں بارش کی تباہ کاریاں۔یوٹی قادر نے افسران کو دی جنگی پیمانے پر راحت رسانی کی ہدایت
منگلورو 8؍جولائی (ایس او نیوز)ساحلی علاقے خصوصاً جنوبی کینرا میں گزشتہ دو چار دنوں سے چل رہی تیز بارش او راس کی تباہ کاریوں کے پس منظر میں اربن ڈیولپمنٹ اینڈ ہاوسنگ منسٹر جناب یوٹی قادر نے ریوینیو اور فائر سروس افسران کو ہدایت دی ہے کہ عوام کو راحت رسانی کا کام جنگی پیمانے پر انجام دیں۔خیال رہے کہ محکمہ موسمیات نے 11جولائی تک اسی طرح کی موسلا دھار برسات ہونے کی پیش گوئی کی ہے۔
محکمہ جاتی افسران کے ساتھ میٹنگ کے بعد وزیر یوٹی قادر نے کہا کہ اس مانسون میں یہاں اب تک 1958.8ایم ایم بارش ہوئی ہے۔ اور محکمہ موسمیات کے مطابق آئندہ دو چار دنوں میں مزید تیز بارش ہونے والی ہے۔اس لئے افسران کو بہت زیادہ چوکنّا رہنا ہوگا اور اعلیٰ افسران کی طرف سے احکامات کا انتظار کیے بغیر عوام کو راحت پہنچانے کے اقدامات کرنے ہونگے۔
وزیر موصوف نے مزید کہا کہ مانسون کے اس موسم میں اب تک برسات کی وجہ سے 929گھروں کو نقصان پہنچا ہے جبکہ گزشتہ دو دنوں میں ہی 12 گھروں کو نقصان پہنچا ہے۔اس کے معاوضے کے طور پر اب تک تقریباً ایک کروڑ روپے متاثرین کو اداکیے گئے ہیں ۔ جبکہ موسمی آفت کی وجہ سے ہلاک ہونے والوں کو23لاکھ روپوں کا معاوضہ ادا کیا گیا ہے۔یو ٹی قادر نے کہا کہ انہوں نے افسران کو ہدایت دی ہے کہ درپیش خطرات والے مقامات کی نشاندہی پہلے سے کرلیں اور راحت رسانی کے کام میں مقامی ماہی گیروں کی پوری طرح مدد لیں۔اس کے علاوہ نیشنل ڈیسیاسٹر ریکوری فریم ورک ٹیم بھی یہاں پہنچنے والی ہے اور وہ اپنے طور پر راحت رسانی کا منصوبہ بنائے گی۔ہیلپ لائن کنٹرول روم بھی 24x7کام کرے گا۔
وزیر موصوف نے ڈپٹی کمشنر دفتر کے احاطے میں فائر سروس ڈپارٹمنٹ کو راحت رسانی کی 8کشتیاں(ریسکیو بوٹس)، تین اسکوبا ڈائیونگ کٹس،درختوں کی کاٹنے کی مشینیں او ر خیمے وغیرہ فراہم کیے جس کی مجموعی لاگت23لاکھ روپے بتائی جاتی ہے۔