منگلورو: آندھرا سے گانجہ اسمگل کرنے والے دو افراد پولیس کی گرفت میں
منگلورو20؍مئی (ایس اونیوز)مصدقہ ذرائع سے ملنے والی اطلاع پر سنٹرل کرائم برانچ کے افسران نے کارروائی کرتے ہوئے دو افراد کو منگلورو میں گرفتار کیا اور ان کے پاس موجود گانجہ ضبط کرلیا ہے۔
بتایا جاتا ہے کہ پولیس کو خفیہ اطلاع ملی تھی کہ دو افرادپمپ ویل سرکل کے قریب اومیگا اسپتال کے سامنے کالج کے طلبہ اور عام افراد کو گانجہ فروخت کرنے کی کوشش کررہے ہیں۔سی سی بی پولیس کے افسران نے موقع پر پہنچ کر کیرالہ سے تعلق رکھنے والے جنید (30سال) اور پتور کے رہنے والے عبدالکریم بیاری (25سال) کو گرفتار کرلیا ۔ تلاشی لینے پر ان کے پاس سے 9.5 کیلو گرام گانجہ برآمد ہوا جسے پولیس نے ضبط کرلیا، جس کی مالیت کا اندزاہ 2,39,000روپے لگایا گیا ہے۔تفتیش کے دوران پولیس کو معلوم ہواہے کہ یہ گانجہ آندھرا پردیش سے بنگلورولایا گیا اور پھر وہاں سے بس کے ذریعے منگلورو میں اسمگل کیا گیا ہے۔سی سی بی نے گرفتار ملزمین اور ضبط کیا گیا گانجہ اگلی کارروائی کے لئے کدری پولیس کی تحویل میں دیا ہے۔