آئندہ 5برسوں میں نیشنل ہائی وے 75 ہوگا؛8لین میں تبدیل،منگلورو۔بنگلوروکا سفر 4سے5گھنٹے میں!
منگلورو،9؍اگست (ایس او نیوز) محکمہ روڈٹرانسپورٹ اینڈ ہائی ویزنے منگلوروکو ریاستی صدر مقام بنگلورو سے جوڑنے والے نیشنل ہائی وے 75کوبھارت مالا پروجیکٹ میں شامل کردیا ہے۔اس پروجیکٹ کے تحت تیزرفتار موٹر گاڑیوں کے لئے سڑکوں کی تعمیر نو اور ترقی کی انجام دی جارہی ہے۔
پتہ چلا ہے کہ مرکزی حکومت کے اس نئے منصوبے کے تحت موجودہ منگلورو۔بنگلورو ہائی وے کو آئندہ پانچ برسوں کے اندر 8لین میں تبدیل کیا جائے گا۔ جس کی لاگت کا تخمینہ 1.2لاکھ کروڑ روپے لگایا گیا ہے۔اس ہائی وے کی تعمیر کا کام نیشنل ہائی وے اتھاریٹی آف انڈیا یا سنٹرل روڈ ریسرچ انسٹی ٹیوٹ کے ذریعے کیا جائے گا۔خبر ہے کہ اس سلسلے میں تفصیلی خاکہ اور رپورٹ تیار ی کے مرحلے میں ہے۔پانچ سال میں تکمیل کے نشانے والے اس مجوزہ منصوبے پر عمل پیرائی کا آغاز اگلے تین چار مہینوں میں متوقع ہے۔
8لین کی اس شاہراہ پر ٹریفک کی عام رفتار120کیلومیٹر فی گھنٹہ رہے گی اس لئے اس پر صرف 2ٹول گیٹ ہونگے جو سڑک کی شروعات اور اختتام پر قائم کیے جائیں گے۔ جبکہ بسوں،کاروں، مال بردار ٹرکوں، اور ایمبولینس وغیر ہ کے لئے جداجدا قطاریں ہونگی۔اس کے علاوہ سڑک پر رکاوٹیں(ہمپس)، گھماؤ اور نشیب و فراز بالکل نہیں رہیں گے۔ اس لئے اندازہ لگایا گیا ہے کہ اس سڑک کی تعمیر کے بعد منگلوروسے بنگلورو کا فاصلہ صرف 4سے 5گھنٹے رہ جائے گا۔