ریاست کے عوام کانگریسی’ غنڈہ حکومت‘ کو بی جے پی کی’ بہترین حکومت ‘سے بدلنے والے ہیں : ساحلی کرناٹک کے دورہ میں امیت شاہ کا دعویٰ
منگلورو 21؍فروری (ایس او نیوز) انتخابی مہم کی تیاری کے لئے ساحلی علاقے کے تین روزہ دورے پر آئے ہوئے بی جے پی صدر امیت شاہ نے سورتکل میں ایک پریس کانفرنس کے دوران ریاستی حکومت کے خلاف خوب بھڑاس نکالی اور بتایا کہ اس بار الیکشن میں عوام کانگریس کی ’غنڈہ حکومت‘ کو بی جے پی کی’ بہترین حکومت ‘سے بدلنے والے ہیں۔
اخباری نمائندوں سے خطاب کرتے ہوئے امیت شاہ نے کہا کہ’’ کرناٹکا کی ریاستی حکومت ملک کی سب سے زیادہ بدعنوان(کرپٹ) حکومت ہے اور سدارامیا سب سے بڑے بدعنوان وزیر اعلیٰ ہیں۔عوام اس حکومت کو گدی سے اتار پھینکنے کے لئے انتخابات کا انتظار کررہے ہیں اوراس میں کوئی شک نہیں ہے کہ ریاستی صدر ایڈی یورپا کی قیادت میں بی جے پی بھاری اکثریت سے جیت حاصل کرے گی۔کانگریس ’غنڈہ گردی والی سرکار‘ چلارہی ہے ،ہم اسے’ بہترین سرکار‘ میں بدل دیں گے۔‘‘
امیت شاہ نے مزید کہاکہ’’ریاست میں اب تک جملہ 22ہندو رکارکنان کا قتل ہواہے۔لیکن حکومت نے ان کی حفاظت یا ان کے خاندان والوں کو انصاف دلانے کے لئے کوئی اقدام نہیں کیا ہے۔میں اپنی پوری سیاسی زندگی میں اس طرح نظریاتی اور سیاسی بنیاد پربدلہ لینے کے معاملات نہیں دیکھے ہیں جیسے کہ کانگریس کے دور حکومت میں ہورہا ہے۔یہاں تک کہ جن لوگوں پر قتل کے معاملات درج ہیں وہ بھی ریاستی کابینہ میں شامل ہیں۔ریاست کے عوام تین Mیعنی مرڈر، مافیا اور منسٹرس سے بیزارآگئے ہیں۔‘‘
ایس ڈی پی آئی اور پی ایف آئی کے تعلق سے امیت شاہ نے تبصرہ کرتے ہوئے کہا کہ ’’ریاستی حکومت نے اقلیتی طبقے کے ملزموں پر سے کیس واپس لینے کا سرکیولر جاری کیا ہے۔ میں نہیں جانتا کہ حکومت پی ایف آئی اور ایس ڈی پی کو کیا پیغام دینا چاہتی ہے۔وزارت داخلہ سنبھالنے کا مجھے بھی تجربہ ہے۔ میں کہہ سکتاہوں کہ حکومت نے جو سرکیولر جاری کیا ہے وہ بالکل غیر دستوری ہے۔‘‘
پی ایف آئی پر پابندی لگانے کے سلسلے میں سوال کاجواب دیتے ہوئے شاہ نے کہا کہ ’’کسی تنظیم پر پابندی لگانے کے لئے کچھ طریقہ کار ہوتا ہے۔ سب سے پہلے ریاستی حکومت کم از کم ان پر دائر کیے گئے مقدمات واپس لینے کاکام تو بند کرے۔اس طرح کی حرکتوں سے پولیس والوں کی ہمت ٹوٹتی ہے۔‘‘
پنجاب نیشنل بینک کو ہزاروں کروڑ روپے کا دھوکہ دے کرفرار ہونے والے نیرو مودی کے وزیراعظم کے ساتھ فوٹو میں شامل ہونے پر کانگریس کے اعتراض کو مضحکہ خیز بتاتے ہوئے امیت شاہ نے کہا کہ ہم اس کے خلاف کڑی کارروائی کررہے ہیں اور اب تک چھاپہ ماری کے دوران 5ہزار کروڑ روپے ضبط کیے گئے ہیں۔الیکشن کی تیاریوں کے تعلق سے امیت شاہ نے کہا کہ ہم ریاست بھر میں بی جے پی کو مستحکم کررہے ہیں۔ تمام اسمبلی حلقوں میں ’نوا شکتی کنونشنس‘ کا اہتمام کیا جارہا ہے۔ان اجلاس کے توسط سے ہم پارٹی کارکنان اور عوام سے رابطہ قائم کرنے میں کامیاب ہونگے۔