منگلورو:20/اپریل(ایس اؤنیوز) قریبی علاقہ بنٹوال کے کروپاڑی میں تلواروں سے کئے گئے حملہ میں ایک شخص اسپتال پہنچنے کے بعد زخموں کی تاب نہ لاکر چل بسا، جس کی شناخت کروپاڑی گرام پنچایت کے نائب صدر عبدالجلیل کروپاڑی کی حیثیت سے کی گئی ہے۔
ذرائع سے ملی اطلاع کے مطابق عبدالجلیل پنچایت میں موجود تھے کہ اچانک چار نقاب پوش بائک پر سوارہوکر پہنچایت پہنچے اور پنچایت کے صحن میں ہی موجود عبدالجلیل پر تلواروں سے حملہ کردیا۔شدید زخمی عبدالجیل کو فوری طورپر دیرلا کٹے اسپتال پہنچایا گیا لیکن علاج کارگر نہ ہوسکا اور انہوں نے وہیں دم توڑ دیا۔
بنٹوال تعلقہ پنچایت کے سنئیر ممبر محمد عثمان کروپاڑی کے بیٹے ، عبدالجلیل کروپاڑی گرام پنچایت کے نائب صدر تھے۔ بہت ہی ہنس مکھ اور سادگی کا پتلا تھے، اس کے بہت سارے دوست تھے، اس کی دوستی اور ہمدردی کو دیکھتے ہوئے عوام کا کہنا ہے کہ اس کا کوئی دشمن ہو ہی نہیں سکتا، اس کے باوجود اس کا اتنی بربریت کے ساتھ قتل کیا جانا کئی شکوک کو جنم دیتاہے۔عبدالجلیل اس سے قبل کروپاڑی گرام پنچایت کے صدر بھی رہ چکے ہیں، مگر اس مرتبہ ریزرویشن کی وجہ سے وہ نائب صدر کے عہدے پر فائز تھے۔ یوتھ کانگریس میں بہت ہی سرگرم کارکن مانے جاتے تھے جس کی بنیاد پر کانگریس کے اعلیٰ لیڈران تک ان کی شناسائی ہونے کی بات کہی جارہی ہے۔
ان کے قتل کو لے کر شبہ ظاہر کیا جارہا ہے کہ عبدالجلیل کی موت کے پیچھے پڑوسی ریاست کیرلا کے لوگوں کا ہاتھ ہوسکتاہے، وٹلا پولس تھانے میں کیس درج کرلینے کے بعد جانچ جاری ہے۔