منگلورو30؍اکتوبر (ایس او نیوز)کرناٹکا اسٹیٹ روڈ ٹرانسپورٹ کی جانب سے بہت جلد بھٹکل سے مینگلور انٹرنیشنل ائرپورٹ کے لئے سرکاری بس سروس شروع کئے جانے کی اطلاعات موصول ہوئی ہیں۔  ذرائع سے ملی اطلاع کے مطابق کے ایس آ ر ٹی سی کے پاس ایئر پورٹ سے منی پال اور اڈپی ہوتے ہوئے بھٹکل تک والوو بس سروس چلانے کا اجازت نامہ پہلے سے موجود ہے۔مگراڈپی ریجنل ٹرانسپورٹ اتھاریٹی کی طرف سے اس کی ٹائمنگ مقرر کرنا ابھی باقی ہے۔ ایک مرتبہ جب آر ٹی اے کی جانب سے اوقات مقرر کردئے جائیں گے تو پھر بھٹکل ، منی پال اور اڈپی سے اس سروس سے استفادہ کرنے والے مسافروں کی تعداد میں اضافہ ہوگا۔ 

ذرائع کی مانیں تو منگلورو سٹی اور انٹرنیشنل ایئرپورٹ کے درمیان بھی بس سروس شروع کی جائے گی۔ اس سلسلے میں پہل کرتے ہوئے ابتدائی مرحلے کے طور پر روزانہ پانچ بسیں اس روٹ پر چلانے کا فیصلہ کیا گیا ہے۔

یاد رہے کہ پچھلے دنوں ریاستی چیف سکریٹری ٹی ایم وجئے بھاسکرنے ایئرپورٹ کا دورہ کرنے کے بعد کے ایس آر ٹی سی افسران کو ہدایت دی تھی کہ انٹرنیشنل ایئر پورٹ سے شہر اور ضلع کے مختلف مقامات کے لئے بس سروس شروع کرنے کے اقدامات کیے جائیں۔چیف سکریٹری کی اس ہدایت کے پس منظر میں کے ایس آر ٹی سی کے افسران نے سروے کا آغاز کیا ہے اور ایئر پورٹ کے افسران کے ساتھ اس پہلو کا جائزہ لے رہے ہیں کہ کن کن مقامات سے اور کن اوقات میں ایئر پورٹ تک کے لئے مسافروں کی آمد و رفت بہت زیادہ ہے۔توقع کی جارہی ہے کہ یہ بات چیت ایک ہفتے کے اندر مکمل ہوگی اور اس کے ساتھ ہی بس سروس کے مقامات طے کرلیے جائیں گے۔

یہ بات قابل ذکر ہے کہ اس سے پہلے بھی منگلورو سٹی سے ایئر پورٹ کے لئے کے ایس آر ٹی سی کی بس سروس شروع کی گئی تھی، لیکن کچھ ہی عرصے بعد زیادہ مسافر نہ ملنے اور آمدنی نہ ہونے کے اسباب بتاکر یہ سروس بند کردی گئی تھی۔

سمجھا جاتا ہے کہ ابتدائی مرحلے میں کاوور، کنکن ناڈی، اسٹیٹ بینک، لال باغ اور مورگن گیٹس سے ہوتے ہوئے بسیں چلیں گی۔ اس کے بعد کے منصوبے میں پتور، سولیا، بنٹوال اور بیلتھنگڈی کے لئے بسیں چلانے کے سلسلے میں بھی غور کیا جارہا ہے۔