اُڈپی 12؍فروری (ایس او نیوز)پچھلے دونوں کوٹاکے قریب مانورو میں ہوئے دوہرے قتل معاملے میں پولیس مزید پانچ ملزمین کو گرفتار کرلیا ہے۔ خیال رہے کہ پڑوسی گھر کے کنویں سے قریب بیت الخلاء کی ٹنکی تعمیر کے مسئلے پر شروع ہونے والا جھگڑا بھرت کمار اور یتیش نامی دو دوستوں کے قتل پر ختم ہوا تھا اور اس سلسلے میں اس سے قبل دو پولیس کانسٹیبلوں سمیت 8ملزمین کو گرفتار کرلیا تھا جن میں کلیدی ملزم ہریش ریڈی اور چندرشیکھر ریڈی بھی شامل تھے۔

سپرنٹنڈنٹ آف پولیس کے دفتر سے جاری اخباری بیان کے مطابق اب جن ملزمین کو گرفتار کیا ہے ان کے نام ابھیشیک عرف ابھی پالن (۲۳سال) ،سنتوش کوندر(۳۵سال)، ناگراج عرف روٹّی ناگراج (۴۴سال)، پرنَو راؤ (۲۰سال) اورشنکر موگویرا ہیں۔بتایاجاتا ہے کہ ابھیشیک نامی ملزم قتل کی اس واردات میں براہ راست ملوث ہے۔وہ پینٹنگ کاکاروبار چلاتا ہے اوربھاری سود پر قرضہ بھی دیا کرتا ہے۔بقیہ چار افراد پر قاتلوں کو پناہ دینے، اور انہیں بھاگنے میں تعاون کرنے کے الزامات ہیں۔پرنَو راؤ جو کہ بی کام فائنل کا طالب علم ہے، اس پر قاتلوں کو رقم اور موبائل فون فراہم کرنے کا الزام ہے۔

اب تازہ گرفتاریوں کے ساتھ سنسنی خیزکوٹا ڈبل مرڈر کیس میں گرفتار کیے گئے ملزمین کی تعداد بڑھ کر 13ہوگئی ہے۔ملزمین کو عدالت میں پیش کیا گیا جہاں سے انہیں 15فروری تک عدالتی حراست میں بھیج دیا گیا۔