کاروار میڈیکل کالج عوام کی خدمت کے لئے تیار
کاروار5؍دسمبر (ایس او نیوز)وزیراعلیٰ کرناٹک سدارامیا کے ہاتھوں 6دسمبر کو ہونے والے افتتاح کے ساتھ کاروار میڈیکل کالج عوامی خدمات اورترقی کی راہ پر چل پڑے گا۔
224کروڑ روپے لاگت کے منصوبے سے تیار ہونے والی میڈیکل کالج کی شاندار7منزلہ عمارت عوام کی دلکشی کا باعث ہوگئی ہے۔کالج میں پڑھانے کے لئے100سے زیادہ ٹیچنگ اسٹاف کا تقرر کیا گیا ہے۔اسپتال کے اندر میڈیسن،سرجری، گائناکولوجی، پیڈیاٹرکس، ای این ٹی،ریڈیالوجی ، سائکیاٹری اور بلڈ بینک ولیباریٹری جیسے تمام اہم شعبہ جات میں ماہرین اورضروری ساز وسامان فراہم کردیاگیا ہے۔
میڈیکل کالج میں ایم بی بی ایس کورس کے لئے 150طلباء کے داخلے ہوئے ہیں۔پیرا میڈیکل میں 140اور جنرل نرسنگ کورس میں 30طلباء کا داخلہ ہوا ہے۔امراض کی تشخیص کے لئے ڈیجیٹل ایکسرے،لیپرواسکوپ،سی آرم، ETOوغیرہ کی جدید سہولتیں مہیا کی گئی ہیں۔ اس کے علاوہ 400بیڈز والے نئے اسپتال کی تعمیر،کنیسر کے علاج کا مرکز،ٹراما کیئر سنٹر،سی ٹی اسکیان،جلے ہوئے مریضوں کے لئے خصوصی وارڈ،ذہنی معذورین کے لئے بازآبادکاری مرکزاور سوپر اسپیشالٹی خدمات کی فراہمی مستقبل کے منصوبوں میں شامل ہے۔