کاروار 29؍جنوری (ایس او نیوز) ریاست گواسے غیر قانونی طور پر کیرالہ کے لئے مچھلی کی لاری میں اسپرِٹ لے جانے کی کوشش کو کاروار چیک پوسٹ پر آبکاری محکمے کے افسران نے ناکام بنادیا ہے۔

موصولہ رپورٹ کے مطابق مچھلی لے جانے والی گاڑی میں مچھلیوں کے صندوق سامنے رکھ کر اس کے پیچھے اسپرِٹ کے ڈبّے کیرالہ کے لئے اسمگل کرنے کی کوشش کی گئی تھی۔ مگر ماجالی چیک پوسٹ پر یہ معاملہ آبکاری محکمے کے علم میں آیا۔ تلاشی کے بعد 3600لیٹر اسپرٹ ضبط کی گئی جس کی مالیت 7.5 لاکھ روپے بتائی جاتی ہے۔کیرالہ کے رہنے والے ڈرائیور جیتین جوش کو گرفتار کرنے کے علاوہ ٹرک بھی ضبط کرلیا گیا ہے۔ آبکاری افیسر منجو ناتھ ارے گولی کی قیادت میں یہ کارروائی انجام دی گئی۔