سپریم کورٹ کے حکم پر شراب خانوں کی بند کرنے سے ضلع اُترکنڑا میں اب تک محکمہ ایکسائز کو پانچ کروڑ کا نقصان
کاروار:28/مارچ(ایس اؤنیوز)قومی شاہراہ اور ریاستی شاہراہ سےمتصل 500میٹر حدود میں جو بھی شراب کی دکانیں ہیں انہیں بندکرنے کا عدالت عظمی کی طرف سے حکم جاری کیا گیا تھا، فیصلے سے اترکنڑا ضلع کے محکمہ ایکسائز کو اب تک کل 5کروڑ روپیوں کانقصان ہواہے، بتایا گیا ہے کہ یکم اپریل سے محکمہ شراب کی مزید دکانیں بند کی جائیں گی جس کے بعد شراب خانوں کو بند کرنے کی تعداد 80 ہوجائے گی۔
ذرائع سے ملی اطلاع کے مطابق محکمہ ایکسائز کو سالانہ 7کروڑ روپئے کی آمدنی ہوتی تھی ، سپریم کورٹ کے فیصلے کے نتیجے میں معاشی سال کے اختتام پر صرف 2کروڑ روپیوں کی آمدنی ہوئی ہے اور 5کروڑروپیوں کانقصان ہواہے، دیہی علاقہ میں ایک لائسنس کے لئے 4.60لاکھ روپئے اور کاروار، سرسی ، ڈانڈیلی جیسے شہری علاقوں میں 5،07،500روپئے لائسنس فیس لی جاتی تھی ۔ اب جب کہ 80شراب خانوں کو بندکیا جائے گاتو آمدنی میں کمی ہونا لازمی ہے۔
محکمہ ایکسائز سے ملی اطلاع کے مطابق سپریم کورٹ کے فیصلے کے بعد شراب کی ماہانہ فروخت کاری میں بدلاؤ ہواہے۔ لائسنس منسوخ ہونےکی فکر میں شراب تاجران شراب کی خریداری کے لئے بھی آگے نہیں بڑھ رہے ہیں۔ فیصلے کے فوری بعد 125دکانوں کی نشاندہی کی گئی تھی لیکن اس وقت باراینڈ ریسٹورنٹ کو الگ کئے جانےسے تعداد 80کوپہنچ گئی اُدھر ریسٹورنٹ کے مالکان بھی شراب کی خریداری نہ کئے جانے کی وجہ سے آمدنی میں کمی واقع ہوئی ہے۔
سپریم کورٹ کے فیصلے میں قومی اور ریاستی شاہراہوں سے متصل شراب خانوں کے لائسنس کو منسوخ کرنے کے علاوہ قومی اور ریاستی شاہراہوں کی حدود والے شہری ، دیہی انتظامیہ سے منسلک مقامات پر شراب بیچنے پر بھی پابندی عائد کی گئی ہے۔ لیکن جن شراب خانوں نے اپنی فیس ادا کی ہے انہیں یکم اپریل تک مہلت دی گئی ہے۔
عام سطح پر یہ بات کہی جارہی ہے کہ عدالت ِ عظمی کا فیصلہ یوں تو ہرطرح کے شراب خانوں پر نافذ ہونا چاہئے لیکن اٹارنی جنرل مکول روہٹگی نے اس سلسلے میں وضاحت پیش کرتے ہوئے ہوٹلوں اور باراینڈ ریسٹورنٹ پر نافذ نہ ہونے کا خیال ظاہر کیا ہے۔ اسی پر انحصار کرتے ہوئے ریاستی ایڈیشنل سکریٹری نے متعلقہ محکمہ جات کو اٹارنی جنرل کی رائے ارسال کی ہے۔ جس کے تحت اترکنڑا ضلع میں 125کے بجائے صرف 80شراب خانوں کو ہی بند کیا جائے گا۔
بھٹکل تعلقہ میں سیما وائن سنٹر، سندھو وائنس، رنگ وائنس، ایم ایس آئی ایل سمیت قومی اور ریاستی شاہراہ جن مقامات سے گزرتی ہے وہاں کے شراب خانوں پر یکم اپریل کو قفل لگایا جائے گا۔ جس کی تفصیل کچھ اس طرح ہے۔سی ایل -2کا لائسنس رکھنےوالے شراب خانوں میں کاروار میں 5۔ انکولہ میں 2۔کمٹہ میں 10۔ہوناور میں 5۔بھٹکل میں 3۔سرسی میں13۔سداپور میں 6۔منڈگوڈ میں 5۔یلاپور میں 6۔ ہلیال میں 10۔ جوئیدا میں1۔اسی طرح سی ایل -II کے تحت کاروار میں 1۔کمٹہ میں 1۔ہوناور میں3۔بھٹکل میں 1۔سرسی میں1۔سداپور میں1۔منڈگوڈ میں 1۔یلاپور میں1۔ہلیال میں 2 اور جوئیڈا میں ایک شراب خانے پر قفل لگا یاجائے گا۔
