بنگلورو۔9؍نومبر(ایس او  نیوز) فرقہ پرست تنظیموں بشمول بی جے پی  کی مخالفت کی پروا کئے بغیر ریاستی حکومت کی طرف سے سنیچر 10 نومبر کو  شیر میسور ٹیپوسلطان کی جینتی تقریبات کا اہتمام شاندار پیمانے پر کرنے کی تیاریاں مکمل کرلی گئی ہیں۔ کل ودھان سودھا کے بینکویٹ ہال میں یہ تقریب منعقد کی جائے گی۔ تقریب کے دوران ریاست کے کسی بھی حصے میں کوئی گڑبڑ نہ ہونے پائے اس کے لئے مختلف اضلاع بشمول کورگ، میسور، منڈیا، کولار، بنگلور وغیرہ میں سخت احتیاطی قدم اٹھائے گئے ہیں اور مختلف علاقوں میں پولیس کا بندوبست بڑھانے کے ساتھ جہاں بھی ضرورت پڑے وہاں امتناعی احکامات لاگو کئے گئے ہیں۔

ٹیپو سلطان جینتی کا مرکزی جلسہ ودھان سودھا میں ہوگا جس میں دو ہزار افراد کی شرکت کے لئے گنجائش رکھی گئی ہے۔ جلسہ گاہ میں وہی داخل ہوسکیں گے جن کے پاس سرکاری دعوت نامہ ہو، باقی کسی کو ودھان سودھامیں داخل ہونے نہیں دیا جائے گا۔ اس تقریب کے لئے کل ودھان سودھا میں حفاظتی انتظامات کو غیر معمولی طور پر سخت کردیاگیا ہے۔ اس کے علاوہ ودھان سودھا کے اطراف واکناف تقریب کے دوران نظر آنے والے مشتبہ افراد کو حراست میں لینے کی ہدایت دی جاچکی ہے۔

بھٹکل  میں بھی منائی جائے گی ٹیپو جینتی: ساحلی شہر بھٹکل میں بھی سنیچر کو مجاہد آزادی اور شیر میسور ٹیپو سلطان شہید کو خراج عقیدت پیش کرنے تعلقہ انتطامیہ کی جانب سے  ٹیپو سلطان جینتی منائی جارہی ہے، اس تعلق سے صبح دس بجے بھٹکل نوائط کالونی کے خوشحال ہال میں ایک خصوصی جلسہ کا اہتمام کیا گیا ہے جس میں ٹیپو سلطان کے حالات زندگی پر مقررین خطاب فرمائیں گے۔ بھٹکل تعلقہ انتظامیہ کے ساتھ ساتھ بھٹکل کا سماجی ادارہ مجلس اصلاح و تنظیم نے عوام الناس سے اس جلسہ میں کثیر تعداد میں شریک ہونے کی درخواست کی ہے۔

سنگھ تنظیموں کی جانب سے ٹیپو جینتی کی مخالفت:  ٹیپو جینتی کی مخالفت کرتے ہوئے بی جے پی اور دیگر فرقہ پرست تنظیموں کی طرف سے ہنگامہ آرائی کے خدشوں کودیکھتے ہوئے حساس اضلاع ، کورگ ، چکمگلور ، چترادرگہ، ہبلی دھارواڑ، منڈیا ، میسور وغیرہ میں  صبح چھ بجے سے 11نومبر کی صبح چھ بجے تک امتناعی احکامات نافذ کردئے گئے ہیں۔ احتیاطی طور پر کولار ضلع میں بھی امتناعی احکامات لگائے گئے ہیں۔ 

عدالت کی منظوری: اس دوران ٹیپو سلطان جینتی پر روک لگانے کے لئے ریاستی ہائی کورٹ میں دائر مفاد عامہ عرضی کو آج خارج کردیا گیا۔ عدالت نے آج عرضی کی سماعت کو تین ہفتوں کے لئے ملتوی کرتے ہوئے ریاستی حکومت کو تقریب کے اہتمام کی اجازت دے دی۔ چیف جسٹس دنیش مہیشوری نے کہاکہ ٹیپو جینتی کے اہتمام کی تیاریاں جب پوری ہوگئی ہیں ایسے میں اسے روکنے کی عرضی داخل کرنا مناسب نہیں ہے۔ انہوں نے عرضی میں نقائص کی نشاندہی کرتے ہوئے کہاکہ اس عرضی میں ریاستی حکومت کے اس فیصلے کا چیلنج نہیں کیاگیاہے، جس کے تحت ٹیپو سلطان جینتی کا اہتمام کیا جارہا ہے۔ اس سے پہلے 2016میں بھی ریاستی حکومت کے خلاف ایسی ہی عرضی دائر کی گئی تھی، جسے مسترد کردیاگیا تھا۔ عرضی گزار پر عدالت نے سخت برہمی کا اظہار کیا۔ عرضی گزار کے وکیلوں نے عدالت سے گزارش کی کہ کل کی تقریب پر کم از کم عبوری روک لگائی جائے، اس پر چیف جسٹس نے سخت برہمی کا اظہار کرتے ہوئے کہا کہ وکلاء اپنی حدسے آگے بڑھنے کی کوشش نہ کریں۔ عدالت کو کیا کرنا ہے یہ عدالت جانتی ہے۔ اس معاملے پر چیف جسٹس نے سماعت تین ہفتوں کے لئے ملتوی کردی اور حکومت کی طرف سے ان تقریبات کے اہتمام پر اپنی منظوری کی مہر لگادی ۔ 

کمار سوامی علیل: وزیراعلیٰ ایچ ڈی کمار سوامی کل منعقد ہونے والی ٹیپو سلطان جینتی تقریبات میں شرکت نہیں کرپائیں گے۔ بتایا جاتا ہے کہ وزیراعلیٰ گزشتہ روز سے علیل ہیں ڈاکٹروں نے انہیں تین دن آرام کرنے کا مشورہ دیا ہے، جس کے سبب آج ہی سے ان کے تمام سرکاری پروگرام منسوخ کردئے گئے ۔ اسی لئے کمار سوامی کی طرف سے ٹیپو سلطان جینتی تقریبات میں شرکت نہیں ہوگی ، البتہ تقریب میں نائب وزیراعلیٰ پرمیشور حاضر رہیں گے۔ کل ٹیپو سلطان جینتی کا جو مرکزی جلسہ منعقد ہورہا ہے، اس کی صدارت رکن اسمبلی وسینئر کانگریس رہنما جناب روشن بیگ کریں گے، تقریب میں امیرشریعت کرناٹک مولانا صغیر احمد خان رشادی، ریاستی وزراء ضمیر احمد خان، یوٹی قادر، ریاستی کونسل کے چیرمین بسوراج ہورٹی ، میئر گنگامبیکے ملیکارجن کے علاوہ اراکین پارلیمان واسمبلی اور دیگر ممتاز شخصیات شرکت کریں گی۔