بھٹکل18 اپریل (ایس او نیوز) بھٹکل اسمبلی انتخابات کے پیش نظر آج بدھ صبح قومی سماجی ادارہ مجلس اصلاح و تنظیم کے اراکین انتظامیہ اور سیاسی پینل کے اراکین کی ایک اہم نشست منعقد ہوئی جس میں کافی گرما گرم بحث ہونے کی اطلاعات ملی ہیں۔ ذرائع نے بتایا کہ اسمبلی انتخابات کو لے کر جے ڈی ایس اُمیدوار عنایت اللہ شاہ بندری جو تنظیم کے نائب صدر بھی ہیں نے اپنے حق میں فیصلہ سنانے کی تمام ذمہ داران سے درخواست کی، مگر جب اُنہیں محسوس ہوا کہ اراکین انتظامیہ کی طرف سے  مطلوبہ تعاؤن نہیں مل رہا ہے تو انہوں نے تنظیم کے احترام میں    انتخابات سے اپنے قدم پیچھے ہٹانے کی بات کہی۔

ذرائع نے بتایا کہ جناب عنایت اللہ شاہ بندری نے جب کہا کہ وہ انتخابات سے دستبردار ہورہے ہیں تو پھر کانگریس کی طرف سے تنظیم کو موصول ہونے والا مراسلہ پڑھ کر سنایا گیا جس میں کانگریس کی طرف سے تنظیم سے اپنے حق میں فیصلہ سنانے کی درخواست کی گئی تھی۔

ذرائع سے ملی خبر کے مطابق بعد میں کانگریس اُمیدوار منکال وئیدیا کو آج بدھ شام پانچ بجے تنظیم دفتر میں آنے کی دعوت دی گئی اور موصوف نے وقت مقررہ پر پہنچ کر تنظیم کے اراکین کے ساتھ مختلف اُمور پر گفتگو کی اور اپنی جانب سے ہر ممکن تعائون کا یقین دلایا۔

ذرائع نے بتایا کہ تنظیم اب اطراف کے علاقوں کے تمام ذمہ داران کے ساتھ ایک اور نشست منعقد کرے گی ، ساتھ ساتھ بھٹکل مسلم یوتھ فیڈریشن  اور محلہ کمیٹیوں کے ذمہ داران وغیرہ  کی موجودگی میں اپنا حتمی فیصلہ لے گی کہ علاقہ   کے مسلمان کس اُمیدوار کو اپنا تعاؤن پیش کریں۔ بتایا گیا ہے کہ فیصلہ ہونے کے بعد اُمیدوار کو تمام جماعتوں کے ذمہ داران کے سامنے بھی پیش کیا جائے گا اور ذمہ داروں کو اُمیدوار کے ساتھ آمنے سامنے بات چیت کرنے کا بھی موقع دیا جائے گا۔خبر ہے کہ اطراف کے علاقوں کے ساتھ ساتھ گلف کی مختلف جماعتوں نے تنظیم کو مراسلات روانہ کئے ہیں اور اپنے اپنے حلقہ کے لوگوں کے خیالات سے تحریری طور پر تنظیم کو آگاہ  کرادیا ہے۔

میٹنگ کی صدارت تنظیم کے صدر جناب مزمل قاضیا نے کی۔جنرل سکریٹری محی الدین الطاف کھروری، سکریٹری مولوی یاسر برماور ندوی، سیاسی پینل کے کنوینر مولوی عبدالرقیب ایم جے ندوی سمیت کافی ذمہ داران اس موقع پر موجود تھے۔