بھٹکل بلاک کانگریس صدر کے عہدہ کے لئے میں طاقتور اُمیدوار ہوں؛ کے جے نائک کا بیان
بھٹکل 14/جون (ایس او نیوز) بھٹکل بلاک کانگریس صدر کے عہدہ کے لئے میں طاقتور اُمیدوار ہوں، اس بات کا دعویٰ تعلقہ کسان اور کھیت مزدور کانگریس سمیتی کے صدر کے جے نائک نے کیا ہے۔
کے جے نائک کے مطابق وہ 30 سالوں سے کانگریس کے وفادار کارکن ہیں اور یوتھ کانگریس صدراور ضلع یوتھ کانگریس جنرل سکریٹری کے طور پر اپنی خدمات انجام دے چکے ہیں جبکہ اب وہ کانگریس کے بھٹکل تعلقہ کسان اور کھیت مزدور سمیتی کی صدارت سنبھال رہے ہیں۔
انہوں نے اپنے تعلق سے مزید کئی باتوں کا ذکر کرتے ہوئے کہا کہ وہ ماروکیری گرام پنچایت صدرکی حیثیت سے خدمات انجام دینے کے بعد دیگر کئی عہدوں پر بھی فائز ہوچکے ہیں اور کئی ایک انتخابات میں کانگریس کے لئے سرگرم ہوکر کام کرچکے ہیں۔ کانگریس کے سنئیر اور جونئیر سبھی کارکنوں کے ساتھ اچھے تعلقات ہیں، جس کی بنا پر کے جے نائک کا کہنا ہے کہ ان سب خدمات کو دیکھتے ہوئے اُنہیں بلاک کانگریس کی خالی ہوئی صدارتی سیٹ کا عہدہ سونپنا چاہئے۔ انہوں نے اس تعلق سے یقین دلایا کہ وہ کارکنوں کو متحد کرنے اور کانگریس کو مزید مضبوط کرنے کی طرف توجہ دیں گے۔