الہ آباد:6/نومبر(ایس او نیوز/آئی این ایس انڈیا)یوپی کے وزیر اعلی یوگی آدتیہ ناتھ نے سنگم نگری الہ آباد کا نام بدلے جانے کے اپنے فیصلے پر سوال اٹھانے والوں کو کرارا جواب دیا ہے، لیکن یوگی کی ہی پارٹی بی جے پی کے ایم پی شیاماچرن گپتا نے حکومت کے اس فیصلے کو لے کر کھلے عام اپنی ناراضگی ظاہر کی ہے۔الہ آباد سے بی جے پی کے ایم پی شیاماچر ن گپتا نے اس بارے میں کہا ہے کہ اگر ان دنوں نام تبدیل کرنے کی ہی سیاست ہو رہی ہے تو سب سے پہلے ملک کا نام تبدیل کرنا چاہئے۔ ان کے مطابق ملک کا صرف ایک نام ہونا چاہئے اور بھارت اور انڈیا کے استعمال پر مکمل پابندی لگا کر صرف ہندوستان بولا جانا چاہئے۔رہنما کی دلیل ہے کہ ہندی میں بھارت اور انگریزی میں انڈیا لکھے جانے پر الجھن پیدا ہوتی ہے، اس لیے مودی حکومت کو چاہئے کہ ملک کا نام اب صرف ہندوستان ہی ہونا چاہئے۔ انہوں نے زور دے کر کہا کہ ہندوستان نام پرانا ہے اور ساتھ ہی اسے ہندی اور انگریزی دونوں میں لکھے جانے پر کوئی فرق نہیں آئے گا۔ اگر نام تبدیل کرنے کا سلسلہ شروع ہوا ہے تو سب سے پہلے ملک کا نام ہی تبدیل کرنا چاہئے۔ان دنوں پارٹی کے خلاف باغیانہ تیور دکھانے والے رہنما شیاما چرن گپتا نے الہ آباد کا نام بدلے جانے پر اپنا سخت اعتراض ظاہر کیا ہے۔ انہوں نے کہا ہے کہ الہ آباد کے نام کے ساتھ ساڑھے چار سو سالوں کی تاریخ منسلک ہے۔ ایسے میں اسے تبدیل کیا جانا مناسب نہیں ہے۔ان کے مطابق بہتر یہ ہوتا کہ اس قدیم شہر کو پریاگ اور الہ آباد دونوں ہی ناموں سے پہلے کی طرح ہی استعمال کیا جاتا رہا ہے ۔ ضلع کا نام الہ آباد ہی رہنے دیا جاتا، جبکہ سنگم اور میلے علاقے کو پریاگ کے نام سے جانا جاتا۔ ان کا خیال ہے کہ نام تبدیل کرنے سے ضلع کو کوئی فائدہ تو ہونے والا نہیں ہے اور یہ فیصلہ صرف سیاست کے پیش نظر کیا گیا ہے۔