ہوناور میں ہوئے سڑک حادثہ میں مرنے والوں کی تعداد بڑھ کر ہوگئی چھ؛ منی پال اسپتال میں ایک خاتون کی ہوئی موت
کاروار 18/ستمبر (ایس او نیوز) تین روز قبل ہوناور تعلقہ کے کرکی نیشنل ہائی وے پر ہوئے سڑک حادثے میں پانچ لوگوں کی موت واقع ہوگئی تھی اور آٹھ لوگوں کو شدید زخمی حالت میں اُڈپی، منی پال اور مینگلور اسپتالوں میں داخل کیا گیا تھا، اس تعلق سے منی پال سے خبر ملی ہے کہ اسپتال میں ایڈمٹ ایک خاتون زخموں کی تاب نہ لاکر چل بسی ہے۔ اس کی موت کے ساتھ ہی حادثہ میں مرنے والوں کی تعداد بڑھ کر چھ ہوگئی ہے۔
مہلوک خاتون کی شناخت تارا ہیگڈے کی حیثیت سے کی گئی ہے۔کرکی میں ٹمپو اور ٹینکر کی ٹکر میں اس خاتون کے سر کو شدید چوٹ لگی تھی اور اسے ہوناور سرکاری اسپتال میں ابتدائی طبی امداد کے بعد منی پال روانہ کیا گیا تھا۔ ڈاکٹروں نے اسے بچانے کی ہرممکن کوشش کی، مگر وہ جانبر نہ ہوسکی ۔